ފަރަންސޭސިވިލާތުގެ އާ ބޮޑުވަޒީރަކަށް 73އ. ގެ މިޝެލް ބާނިއާ އައްޔަންކޮށްފިއެވެ.

ފަރަންސޭސި ބޮޑުވަޒީރަކަށް ބާނީއާ އައްޔަންކުރިކަން އެގައުމުގެ ރައީސް އެމަނުއެލް މެކްރޯން އިއުލާން ކުރެއްވީ މިއަދެވެ. ބާނިއާ އަކީ ފަރަންސޭސިވިލާތުގެ އިސް މަގާމުތަކެއްގެ އިތުރުން ޔޫރަޕިއަން ޔުނިއަން (އީޔޫ) ގެ އިސް މަގާމުތަކެއް ވެސް ފުރުއްވާފައިވާ ބޭފުޅެކެވެ. އެގޮތުން އިނގިރޭސިވިލާތް އީޔޫ އިން ވަކިވުމާ ގުޅޭ ގޮތުން ހިނގައި ދިޔަ މުއާމަލާތްތަކުގައި އީޔޫ އިން އިނގިރޭސިވިލާތުގެ ޓާސްކް ފޯހުގެ ވެރިއެއްގެ ރޯލު ބާނިއާ އަދާކުރައްވާފައިވެއެވެ.

ބާނީއާ އަދާކުރެއްވި މަގާމުތަކުގެ ތެރޭގައި ޔޫރަޕިއަން ކޮމިޝަނަރ ފޮރ އިންޓަރނަލް މާކެޓް ސަރވިސްގެ މަގާމާއި އީޔޫ ބަރުލަމާނުގެ މެންބަރުކަމުގެ އިތުރުން ފަރަންސޭސިވިލާތުގެ އެގްރިކަލްޗަރ އެންޑް ފިޝަރީޒް މިނިސްޓަރުކަމާއި ފޮރިން މިނިސްޓަރުކަމުގެ އިތުރުން އެންވަޔަރަމަންޓް މިނިސްޓަރުކަން ހިމެނެއެވެ.

ބާނިއާ އަކީ ފަރަންސޭސި ސިޔާސީ ތާރީޚުގައި އެގައުމުގެ ބޮޑުވަޒީރަކަށް އައްޔަން ކުރެވުނު ޢުމުރުން އެންމެ ދުވަސްވީ ބޮޑުވަޒީރެވެ.

ފަރަންސޭސިވިލާތަށް އާ ބޮޑުވަޒީރަކު އައްޔަންކޮށްފައި މި ވަނީ އެންމެ ފަހުން އެ މަގާމުގައި ހުންނެވި ގެބްރިއަލް އަޓަލް، 46އ. ޖުލައި މަހުގެ ތެރޭގައި މަގާމުން އިސްތިއުފާ ދެއްވުމާ ގުޅިގެންނެވެ. އޭނާ އިސްތިއުފާ ދެއްވީ ގާނޫނު ހަދާ މަޖިލީހުގެ އިންތިޚާބުގައި މެކްރޯންގެ ކޯލިޝަނަށް މެޖޯރިޓީ ގެއްލިފައި ވަނިކޮށެވެ.