ޣައްޒާގެ ސްކޫލެއްގައި ހިޔާވަހިކަން ހޯދަމުން ދިޔަ ބަޔަކަށް އަމާޒުކޮށް ނިރުބަވެރި އިސްރާއީލުން ދިން ރޮކެޓް ހަމަލާއެއްގައި އަށް މީހުން ޝަހީދުވެއްޖެއެވެ.

އިސްރާއީލުން ޣައްޒާގެ ނަސްލު ނައްތާލުމަށަ ކުރަމުންދާ ހަނގުރާމައިގައި ޣައްޒާގެ އެކި ހިސާބުތަކަށް އަރައިގަނެ ވަރުގަދަ ހަމަލާތަކެއް ދަނީ ދެމުންނެވެ. އެގޮތުން އިއްޔެ އިސްރާއީލުން ބުނީ ޣައްޒާގެ އުތުރުގައި އޮންނަ ހަލީމާ އަލް ސާދިއްޔާ ސްކޫލަށް ހަމަލާދީފައިވާ ކަމަށާއި އެ ސްކޫލުގައި ހިޔާވަހިކަން ހޯދަމުން ދިޔަ ފަލަސްތީނުގެ އަށް މީހަކު ޝަހީދުކޮށްލާފައިވާ ކަމަށެވެ.

މި ހާދިސާގެ އިތުރަށް އިސްރާއީލުން ޣައްޒާގެ މެދުތެރޭގައި އޮންނަ ނޫސެއިރާތު ރެފިއުޖީ ކޭމްޕަށް ދިން ހަމަލާގައިވެސް ފަސް މީހަކު ވަނީ ޝަހީދުވެފަ އެވެ.

ހުކުރު ދުވަހު އެކަނިވެސް އިސްރާއީލުން ޣައްޒާގެ ހިސާބުތަކަށް ދިން ވައިގެ ހަމަލާތަކުގައި ފަލަސްތީނުގެ 33 މީހަކު ޝަހީދުވެފައިވާ ކަމަށް އެގައުމުގެ މެޑިކަލް މަސްދަރުތަކުން ރިޕޯޓު ކުރެ އެވެ.

ވަފާ ނޫސް އެޖެންސީން ރިޕޯޓްކުރާ ގޮތުގައި ފާއިތުވި ހަފްތާގެ ތެރޭގައި އިސްރާއީލު ސިފައިން ހިފާފައިވާ ހުޅަނގު އައްސޭރީގައި ހިންގި ޖަރީމާތަކުގައި ފަލަސްތީނުގެ 10 ވަރަކަށް މީހުން ޝަހީދުކޮށްލާފައިވާއިރު އޭގެ ތެރޭގައި އުމުރުން 13 އަހަރުގެ އަންހެން ކުއްޖަކު ބަނާ އަމްޖަދު ބަކުރު ވެސް ހިމެނެ އެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި 40،878 މީހުން ޝަހީދުވެ 94،454 މީހުން ޒަޚަމްވެފައިވެއެވެ. އޮކްޓޯބަރު މަހުގެ ހަތް ވަނަ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގެ 1،139 މީހުން މަރުވެފައިވެ އެވެ.