އޮލިމްޕަހުގައި މިހާރު ދައްކަމުންދާ ދިވެހި ފިލްމު "ކަމަނާ" ގެ އިތުރުކުރި ތިން ޝޯގެ ޓިކެޓުވެސް ވިކި ހުސްވެއްޖެއެވެ.

އޯގަސްޓް މަހުގެ 27 ގައި އޮލިމްޕަހުގައި އެޅުވި މި ފިލްމުގެ ޝޯތައް އޮލިމްޕަހުގައި ކުރިޔަށް ގެންދިއުމަށް ރާވާފައި އޮތީ ސެޕްޓެމްބަރު މަހުގެ 14 އިގެ ނިޔަލަށެވެ.

ރޭގަނޑު 8:30 ގެ އިތުރުން ރޭގަނޑު 11:30 ގައިވެސް ޝޯތައް ބާއްވަމުން ގެންދާ މި ފިލްމުގެ އިތުރު ޝޯތަކެއްގެ ބާއްވަނީ މި މަހުގެ 10 ވަނަ ދުވަހާއި, 11 ވަނަ ދުވަހުގެ އިތުރުން 13 ވަނަ ދުވަހުގެ އިތުރު ގަޑި ތަކެއްގައެވެ.

އަންނަ ހުކުރު ދުވަހުގެ މެންދުރު ފަހު 3:30 ގައި ބާއްވަން ނިންމި ޝޯގެ ޓިކެޓްވެސް މިހާރު ހުސްވެފައިވާތީ ކަމަނާގެ ޕްރޮޑަކްޝަން ޓީމުން ވަނީ 14 ވަނަ ދުވަހުގެ މެންދުރު ފަހުގެ ޝޯއަކާއި އެރޭ 11:30 ގައި އިތުރު ޝޯއެއް ބޭއްވުމަށް ޓިކެޓް ވިއްކުމަށް ނިންމާފައެވެ.



މީގެއިތުރުން ހަފްތާ ބަންދުގައި އަތޮޅުތަކުގައި އެކަނިވެސް ފިލްމުގެ 32 ޝޯއެއް ކުރިޔަށް ގެންގޮސްފައިވެއެވެ.

މި ހުރިހާ ޝޯއެއްވެސް ކުރިޔަށް ގެންގޮސްފައިވަނީ ހައުސްފުލް ޝޯތަކެއްގެ ގޮތުގައެވެ.

ކިޑް ޕްރޮޑަކްޝަންއާއި ސެޓަރން ސްޓޫޑިއޯ ހުށަހަޅައިދިން މި ފިލްމުގެ ޕްރޮޑިސަރުންނަކީ ކާމިޔާބު ފިލްމު "ލޯބިވެވިއްޖެ" ގެ ޕްރޮޑިއުސަރ ޝާނިޒް އަލީ އަދި ހުސެން މުނައްވަރެވެ.

މަހުދީ އަހުމަދު ސްކްރީން ޕްލޭ ލިޔެފައިވާ މި ފިލްމުގެ ޑައިރެކްޓަރަކީ ހުސެން މުނައްވަރެވެ.

މި ފިލްމުގައި އަންބެއްގެ ކެތްތެރިކަމާއި ރާއްޖޭގައި ގެވެށި އަނިޔާ ގޮސްފައި އޮތް ބިރުވެރި މިންވަރު ފެނިގެންދާއިރު މިއީ ހަގީގީ ހާދިސާއެއްގެ މައްޗަށް ބިނާކޮށް އުފައްދާފައިވާ ފިލްމެކެވެ.