ޕޯޗުގަލްގައި ސަލާމަތީ ފިޔަވަޅުތައް އެންމެ ބޮޑަށް ހަރުކަށި ކޮށްފައިވާ ޖަލަކުން ގައިދީންތަކެއް ފިލައިފިއެވެ.

ޕޯޗުގަލްގެ ’ވަލް ދެ ޖުދިއުސް‘ ޖަލުން ފިލާފައިވަނީ ފަސް ގައިދީން ކަމަށް އެގައުމުގެ ކަމާބެހޭ އިދާރާތަކުން މައުލޫމާތުދެއެވެ. އެގޮތުން ޖަލުން ފިލާފައިވާ މީހުންނަކީ އިނގިރޭސިވިލާތާއި, އާޖެންޓީނާގެ އިތުރުން ޖޯޖިޔާގެ ރައްޔިތަކާއި ޕޯޗުގަލްގެ ދެ މީހުންނެވެ. މި ޖަލަކީ ވެރިރަށް ލިސްބަންގެ 30 ކިލޯމީޓަރު އުތުރުގައި އޮންނަ ރަށެއްގައި ހުންނަ ޖަލެކެވެ.

މި ހާދިސާއާ ގުޅިގެން ޕޯޗުގަލްގެ ޖަލުތަކާބެހޭ އިދާރާއިން ބުނީ، ފަސް ގައިދީން ޖަލުން ފިލާފައި ވަނީ އެހެން ބަޔެއްގެ އެހީތެރިކަމާ އެކުގައި ކަމުގައެވެ. އަދި، ޖަލުގެ ބޭރު ފާރުމައްޗަށް އަރައި ގައިދީންތައް ފިލާފައި ވަނީ ބޭރުގައި ތިބި ބަޔަކު ފޯރުކޮށްދިން ހަރުގަނޑެއް ބޭނުން ކޮށްގެން ކަމަށް ބެލެވޭ ކަމަށެވެ.

ޖަލުން ފިލި ގައިދީން އަތުލައިގަތުމަށް ޕޯޗުގަލްގެ ފުލުހުން ޚާއްޞަ އޮޕަރޭޝަނެއް ފަށާފައިވާއިރު ޕޯޗުގަލްގެ ދެ ގައިދީންނަކީ މަސްތުވާތަކެތީގެ ވަގުވިޔަފާރި ކުރުމާއި ކުށްކުރާ ގުރޫޕުތަކުގައި ބައިވެރިވުމާއި ވައްކަމާއި މީހުން ވަގަށް ގެންދިޔުމުގެ ކުށުގައި 25 އަހަރުގެ ޖަލު ޙުކުމެއް އިއްވާފައިވާ ދެ މީހުންނެވެ.

ޕޯޗުގަލްގެ ޖަލުތަކާބެހޭ އިދާރާއިން ބުނީ، ޖަލުން ފިލާފައިވާ ބޭރު ގައުމުތަކުގެ ތިން ގައިދީންނަކީ ވައްކަމާއި މީހުން ވަގަށް ގެންދިޔުމުގެ ކުށުގެ ދަޢުވާ ސާބިތުވެ ޖަލު ޙުކުމް ތަންފީޒު ކުރަމުން ދިޔަ ބަޔެއް ކަމަށެވެ.

މި ޖަލުގައި 560 ގައިދީން ޙުކުމް ތަންފީޒު ކުރަމުންދާކަން ފާހަގަ ކުރެވެއެވެ.