ނިރުބަވެރި އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި އެގައުމުގެ ރައްޔިތުންނާ ދެކޮޅަށް ބޭނުންކުރާ އެމެރިކާގެ ހަތިޔާރުގެ ސަބަބުން ޣައްޒާގެ ރައްޔިތުން ވިރެމުންދާކަމަށް ރިޕޯޓްތައް ބުނެފިއެވެ.

ޣައްޒާގެ ދެކުނުގައި އޮންނަ އަލްމަވާސީ "ސޭފް ޒޯން" ކަމަށް ބުނާ ތަނަށް އިސްރާއީލުން ބޮން އަޅާފައިވާއިރު މި ބޮން ތަކުގައި 19 މީހުން ވަނީ ވިރިގެން ގޮސްފައެވެ. އެމެރިކާއިން އިސްރާއީލަށް ހަދިޔާކުރި މި ނުރައްކާތެރި ބޮމުގެ ހަމަލާގައި 60 މީހުން ޒަޚަމްވި ކަމަށް އޮފިޝަލުން މައުލޫމާތު ދެއެވެ. މީހުންނަށް ލިބިފައިވާ ޒަޚަމްތަކަށް ބަލާފައި މި ހާދިސާގައި މަރުވާ މީހުންގެ އަދަދު އިތުރުވެދާނެ ކަމަށްވެސް މިހާރު ބެލެވެއެވެ.

އަލްޖަޒީރާގެ ސަނަދު އެޖެންސީން ކުރި ތަހުގީގުން ދައްކާ ގޮތުގައި އިސްރާއީލުން މިހަމަލާގައި ބޭނުން ކޮށްފައި ވަނީ އެމެރިކާއިން އުފައްދާފައިވާ އެމްކޭ 84 ބޮމެވެ. ޣައްޒާގެ އޮފިޝަލުން ބުނާގޮތުގައި މި ހަމަލާތަކުގައި އިސްރާއީލުން ވަނީ 2،000 ޕައުންޑްގެ ހަތިޔާރު ބޭނުން ކޮށްފައެވެ.

އިސްރާއީލުން ޣައްޒާއާގެ ނަސްލު ނައްތާލުމަށް ކުރަމުންދާ ހަނގުރާމައިގައި މިހާތަނަށް 41،020 މީހުން މަރުވެ 94،925 މީހުން ވަނީ ޒަޚަމްވެފައެވެ. އޮކްޓޯބަރު މަހުގެ ހަތް ވަނަ ދުވަހު ހަމާސްއިން އިސްވެ އިސްރާއީލަށް ދިން ހަމަލާގައި މަރުވި މީހުންގެ އަދަދު 1،139 އަށް އަރާއިރު، 200 އަށް ވުރެ ގިނަ މީހުން ވަނީ ރަހީނުކޮށްފައެވެ.