ވިއެޓްނާމްގެ އުތުރު ސަރަހައްދަށް އައި ތޫފާން ޔާގީގެ ސަބަބުން މަރުވި މީހުން އަދަދު 200 އަށް ވުރެ މައްޗަށް އަރައިފިއެެވެ.

ވިއެޓްނާމްގެ ދައުލަތުގެ މީޑިޔާ އިން އިއްޔެ ބުނީ ތޫފާން ޔާގީގެ ސަބަބުން ގާތްގަނޑަކަށް 200 މީހުން މަރުވެފައިވާ ކަމަށެވެ. އަދި ފްލެޝް ފްލަޑްތަކާއި ބިންގަނޑު ކަނޑައިގެން ދިއުމުން 128 މީހުން ގެއްލިފައިވާ ކަމަށް ދައުލަތުގެ މީޑިއާ އިން ވަނީ ރިޕޯޓްކޮށްފައެވެ.

ވިއެޓްނާމްގެ ވީއެންއެކްސްޕްރެސް ނޫހުން ރިޕޯޓްކޮށްފައިވާ ގޮތުގައި ތޫފާންގައި 200 މީހުން މަރުވެފައިވާއިރު 800 އަށް ވުރެ ގިނަ މީހުން ވަނީ ޒަޚަމްވެފައެވެ. ވިއެޓްނާމްގެ ގިނަ ސަރަހައްދުތަކުގައި އަދިވެސް ކަރާއި ހަމައަށް ފެން ހުރި ކަމަށް ބައެެއް ރިޕޯޓްތަށް ބުނެ އެވެ.

ތޫފާނުގެ ސަބަބުން ވިއެޓްނާމްގެ ދަނޑުވެރިކަމަށް ވަނީ ބޮޑެތި ގެއްލުންތަކެއް ލިބިފައެވެ. އެގްރިކަލްޗަރ މިނިސްޓްރީގެ އޮފިޝަލުން ބުނީ ތޫފާންގެ ސަބަބުން ގާތްގަނޑަކަށް 210،000 ހެކްޓަރުގެ ދަނޑުވެރިކަމުގެ ބާވަތްތައް ނެތިގޮސްފައިވާ ކަމަށެވެ.

ތޫފާނުގެ ސަބަބުން ވިއެޓްނާމްގެ ގިނަ އަދަދެއްގެ މީހުން ވަނީ ގެދޮރު ގެއްލި، ހާލުގައި ޖެހިފައިވެއެވެ. ތޫފާނާއި ގުޅިގެން ވިއެޓްނާމްގެ އުތުރު ސަރަހައްދުގެ ގިނަ އަދަދެއްގެ އިމާރާތްތަކަށް ގެއްލުން ލިބި، މަގުތައް ބަންދުވެ، ކަރަންޓު ކެނޑި، އަދި މުވާސަލާތީ ވަސީލަތްތަކަށް ވަނީ ބުރޫއަރާފައެެވެ.