ނިރުބަވެރި އިސްރާއީލުގެ ހަމަލާތަކުގެ ސަބަބުން ޣައްޒާގެ 80 އިންސައްތަ ވިޔަފާރިއަށް ފޫނުބެއްދޭ ވަރުގެ ގެއްލުން ވެފައިވާ ކަމަށް އދ އިން ހާމަކޮށްފިއެވެ.

އދ. އިން ނެރުނު ރިޕޯޓެއްގައި ބުނެފައިވާ ގޮތުގައި ނިރުބަވެރި އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގެ ސަބަބުން ފަލަސްތީނުގެ އިގްތިސާދުގެ ބޮޑު އިންސައްތަ އަކަށް ވަނީ ބޮޑު ގެއްލުމެއް ވެފައެވެ. އެގޮތުން 2022 ވަނަ އަހަރުގެ އެ ހިސާބުގެ އިގްތިސާދު ހުރި ވަރަށްވުރެ ހަބައިކުޅަ އެއްބައި އަށް ވުރެ ކުޑަވެފައިވާކަމަށް އދ. އިން ބުނެއެވެ.

އިސްރާއީލުން ހިންގާ ލާއިންސާނީ އަމަލުތަކުގެ ސަބަބުން ޣައްޒާގެ އުފެއްދުންތެރިކަން ވަނީ އެއްކޮށްހެން ހަލާކުވެ، އެގައުމުގައި ފަގީރުކަން އިންތިހާއަށް އިތުރުވެ، މީހުން ދިރިއުޅެމުން ދިޔަ ގިނަ ހިސާބުތައް އެއްކޮށްހެން ވަނީ ހަލާކުކޮށް ސުންނާފަތިވެފައެވެ.

ޔޫ.އެން ޓްރޭޑް އެންޑް ޑިވެލޮޕްމަނަޓް އެޖެންސީ(ޔޫއެންސީޓީއޭޑީ)ގެ ފަލަސްތީނުގެ އެހީގެ ޕްރޮގްރާމް ކޯޑިނޭޓް ކުރައްވާ މުޢުތަޞިމް އަލްއަޤްރަޢު ވިދާޅުވާގޮތުގައި މިހާރުގެ ހާލަތުން އެއްކޮށް އަރައިގަނެ ފަލަސްތީން އަލުން އާރާސްތު ކުރުމަށް ކިހާ ޚަރަދެއް ހޭދަވާނެ ކަމެއް އަދި ސާފު ނުވާ ކަމަށެވެ. ނަމަވެސް އޭނާ ވިދާޅުވީ މިކަމަށް އެތައް ބިލިއަން ޑޮލަރެއް ހަރަދުވާނެ ކަމަށް ބެލެވޭ ކަމަށެވެ.

މުޢުތަޞިމް ވިދާޅުވީ އޮކްޓޫބަރު 2023 ގައި ޣައްޒާ އޮތް ހާލަތަށް އެގައުމު އަނބުރާ ގެންނަށް އެތައް އަހަރެއް ނަގާނެ ކަމަށެވެ.