ފަރަންސޭސިިލާތުގެ ރައީސް އިމާނުއަލް މެކްރޯންގެ އަނބިކަނބަލުން ބްރިޖީޓް މެކްރޯންއަކީ ފިރިހެނެއް ކަމަށް ބުނި މައްސަލައިގައި އެ ގައުމުގެ ކޯޓަކުން ދެ މީހަކު ބޮޑު އަދަދަކުން ޖޫރިމަނާކޮށްފި އެވެ.

މެކްރޯންގެ އަނބިކަނބަލުންނަކީ އަސްލު ފިރިހެނެއް ކަމަށާއި އަދި ޖިންސު ބަދަލުކޮށްގެން އުޅޭ ކަމުގެ އަޑުތަކެއް އެންމެ ފުރަތަމަ ފެތުރުނީ ފްރާންސްގެ މިނިވަން ނޫސްވެރިޔާ އެމާންޑައިން ރޯއީ އެފަދަ ވާހަކަތަކެއް 2021 ވަނަ އަހަރު ރިޕޯޓްކުރި ހިސާބުން ނެވެ.

އެ ވާހަކަތައް ވައިރަލްވެ އެކްސްގައި ވެސް އެއާ ގުޅޭ ހޭޝްޓެގެއް ވަނީ ވައިރަލްވެފަ އެވެ.

އެ މައްސަލައިގައި މި ފަހަރު ޖޫރިމަނާކޮށްފައިވަނީ ރޯއީ އަދި ރޭ ކިޔާ އަންހެނެކެވެ. އެގޮތުން މެކްރޯންގެ އަނބިކަނބަލުންނަށް ބަދަލުގެ ގޮތުގައި 8000 ޑޮލަރު އަދި އަނބިކަނބަލުންގެ އާއިލާގެ ކޮންމެ މީހަކަށް ވެސް ބަދަލުގެ ގޮތުގައި 5000 ޑޮލަރު ދިނުމަށް ކޯޓުން ވަނީ ހުކުމްކޮށްފަ އެވެ.

މެކްރޯންގެ އަނބިކަނބަލުންނަކީ މެކްރޯންއަށް ވުރެ 24 އަހަރު ދޮށީ ބޭފުޅެކެވެ. އެހެންވެ އެ ކައިވެންޏަށް ގިނަ ބަައެއްގެ ފާޑުކިއުން އަމާޒުވެފައި ވެއެވެ. ހާއްސަކޮށް އެ ގުޅުން ފެށުނީ މެކްރޯންއަށް 18 އަހަރުވެސް ނުފުރި އުޅެނިކޮށް ކަމަށްވާތީ މިއީ ކުޑަކުދިންނާ ބެހުން ކަަމަށް ވެސް ބައެއް ފަރާތްތަކުން ސިފަކޮށްފައި ވެއެވެ.