ޕޯލިއޯ ކެމްޕޭންގެ ފުރަތަމަ މަރުހަލާ ނިމުމުން އަނެއްކާޥެސް ނިރުބަވެރި އިސްރާއީލުގެ ހަމަލާތައް ޣައްޒާއަށް އަމާޒުވެއްޖެއެވެ.

އިސްރާއީލުން ޣައްޒާއާ ދެކޮޅަށް ހިންގަމުންދާ ލާއިންސާނީ އަމަލުތައް މެދުކެނޑިފައި އޮތުމަށްފަހު އަނެއްކާވެސް ވަރުގަދަ ހަމަލާތަކެއް ދީ ޣައްޒާގެ 19 މީހަކު ޝަހީދުކޮށްލައިފިއެވެ. ރިޕޯޓްތައް ބުނާ ގޮތުގައި އިސްރާއީލުގެ ހަމަލާތައް ވަކި ގަޑިތަކަކަށް ހުއްޓާލާފައި އޮތުމަށް ފަހު ޕޯލިއޯ ކެމްޕޭންގެ ފުރަތަމަ މަރުހަލާ ނިމުމުން އަނެއްކާވެސް ހަމަލާތައް ވަނީ ފަށާފައެވެ.

އިސްރާއީލުގެ އަސްކަރިއްޔާއިން ޣައްޒާގެ ރައްޔިތުންނާ ދެކޮޅަށް ގެންދާ ޖަރީމާތައް ކުރިއަށްދާއިރު، ޣައްޒާގެ އުތުރުގެ ސިޓީއާއި ދެކުނުގައި ޚާން ޔޫނިސްއަށް ދިން ހަމަލާތަކުގައި ފަލަސްތީނުގެ ގިނަ ޝަހީދުކޮށްލާފައިވާއިރު އެތައް ބަޔަކަށް ވަނީ އެކި ވަރުގެ ޒަހަމްތައްވެސް ލިބިފައެވެ.

ޣައްޒާގެ ރައްޔިތުންނަށް ޕޯލިއޯ ވެކްސިން ދިނުމަށް އދ. އިން ހިންގި ކެމްޕޭނުގައި 12 ދުވަހުގެ ތެރޭގައި ގާތްގަނޑަކަށް 560،000 ކުދިންނަށް ފުރަތަމަ ޑޯޒްގެ ވެކްސިން ވަނީ ދީފައެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި މިހާތަނަށް 41،118 މީހުން ޝަހީދުކޮށްލާފައިވާއިރު 95،125 މީހުން ޒަޚަމްވެފައިވެއެވެ. އިސްރާއީލުގައި އޮކްޓޯބަރު މަހުގެ ހަތް ވަނަ ދުވަހު ހަމާސް އިސްވެ އޮވެ ދިން ހަމަލާތަކުގައި މަރުވި މީހުންގެ އަދަދު 1،139 އަށް އަރާއިރު، 200 އަށް ވުރެ ގިނަ މީހުން ވަނީ ރަހީނުކޮށްފައެވެ.