ކުޑަކުދިންނަކީ އެކުދިންގެ މައިންބަފައިންނާއި އާއިލާގެ ހުރިހާ މެމްބަރުންގެ ފަރާތުންވެސް ލޯތްބާއި އޯގާތެރިކަން ބޭނުންވާ ބައެކެވެ. ނަމަވެސް ބައެއް ފަހަރު ދިރިއުޅުމުގެ ކަންތައްތައް ހުންނަ ގޮތުން އެކުދިންގެ މައިންބަފައިން އަދި އާއިލާ މީހުންގެ ފަރާތުން އެކުދިންނަށް ބޭނުންވާ ވަރަށް ލޯތްބާއި އަޅާލުމާއި ސަމާލުކަން ނުލިބޭ ފަހަރުވެސް އާދެއެވެ. މިފަދަ ދަނޑިވަޅުތަކުގައި އެކުދިން މައިންބަފައިންގެ ސަމާލުކަން ހޯދަން ތަފާތު އެކި ކަންތައް ކުރެއެވެ.

އެގޮތުން ބަލާއިރު ދަރިން މައިންބަފައިންގެ ސަމާލުކަން ހޯދަން އެންމެ ގިނައިން ކުރާ ކަމަކީ މައިންބަފައިން އެހެން މީހުންނާ މުއާމަލާތު ކުރާއިރު އެކަން ހުއްޓުވަން މަސައްކަތް ކުރުމެވެ. އެކުދިން ކުރާ ބައެއްް ކަންކަމުގެ ތެރޭގައި މައިންބަފައިންނަށް އުނދަގޫވާނެހެން ބާރަށް ވާހަކަ ދެއްކުމާއި، ބޭކާރު ސުވާލުތައް ކުރުން ހިމެނެއެވެ. މިކަން އާންމުކޮށް ވަނީ އެކުދިންނަށް ބޭނުންވާ ވަރަށް ސަމާލުކަން ނުލިބުމުގެ ސަބަބުން އެކުދިންނަށް ބާކީވެފައިވާ ކަމުގެ އިހުސާސް ކުރެވޭތީއެވެ.

އަދި ހަދަހަދައިގެން ކަންވި ގޮތާ ހިލާފަށް ވާހަކަ ދެއްކުމަމީވެސް ބައެއް ކުދިން އެކުދިންގެ މައިންބަފައިންގެ ސަމާލުކަން ހޯދުމަށް ކުރާ ކަމެކެވެ. އެގޮތުން ސްކޫލުގައި ނުވަގަ އެހެނިހެން ކަންކަމުގައި ދިމާވާ އެކި ކަންތަކުގެ ވާހަކަ މާ ބޮޑު ކޮށްގެން ނުވެސް ވާ ކަންތައް އިތުރު ކޮށްގެން ދައްކައެވެ. ބައެއް ފަހަރު އެކުދިންގެ ހިޔާލު ބޭނުން ކޮށްގެން ތަފާތު އެކިކަހަލަ ސިނޭރިއޯތައް އުފައްދާ ތަންވެސް އާދެއެވެ.

މީގެ އިތުރުން ރުޅި އައިސް ގޮތް ދެއްކުމަކީ (ޓޭންޓްރަމްސް) ވެސް ވަރަށް ގިނަ ކުދިން އެކުދިންގެ މައިންބަފައިންގެ ސަމާލުކަން ހޯދުމަށް ކުރާ ކަމެކެވެ. އެގޮތުން ރޮއެ، ބިންމަތީގައި ފައި ތަޅައި ހަޅޭއް ލެވުމަކީ މިފަދައިން ކުދިން މައިންބަފައިންގެ ސަމާލުކަން ހޯދުމަށް ކުރާ ކަންކަމެވެ. އެކުދިން މިހެން ކަންތައް ކުރަނީ އެކުދިންގެ ކޮންމެވެސް ބޭނުމެއް ފުއްދިފައި ނުވާތީ ނުވަތަ ޖަޒުބާތީގޮތުން ބަލިކަށި ވެފައިވާތީއެވެ.

ވީމާ ދަރިފުޅުގެ ފަރާތުން މިފަދަ ކަންތައް ފެންނަ ނަމަ އެކުދިންނަށް ރުޅި އައިސް އަޑު އުފުލުމުގެ ބަދަލުގައި އެ ބޭނުންވާ ލޯތްބާއި އޯގާތެރިކަން ފޯރުކޮށްދޭން ޖެހެއެވެ. އަދި އެކުދިންގެ ވާހަކަތައް އަޑުއަހައި އެކުދިންނަށް ސަމާލުކަންވެސް ދޭން ޖެހެއެވެ.