ކުރިޔަށް އޮތް ވަގުތުތަކުގައި ރާއްޖޭގެ މޫސުން ގޯސްވާނެ ކަމަށް ލަފާކުރެވޭތީ، މުޅި ރާއްޖެއަށް، މޫސުމާއި ބެހޭ ގައުމީ އިދާރާއިން ނެރުނު ހުދު ސަމާލު މިރޭ 1:00 ގެ ނިޔަލަށް ދަންމާލައިފިއެވެ.

މޫސުމާ ބެހޭ އިދާރާއިން މިއަދު މެންދުރު ނެރުނު އެ ސަމާލުގެ ވަގުތު ހަމަވީ އިރުއޮއްސި 6:30 އަށެވެ. އެ ސަމާލު މިރޭ 1:00 އަށް އިތުރުކޮށްފައިވާއިރު އެ ސަމާލުގައި ބުނެފައި ވަނީ ގަޑިއަކު 19 މޭލާއި 24 މޭލު ދެމެދުގެ ބާރުމިނުގައި ވައި ޖެހޭނެ ކަމަށާއި، އަދި ވިލާ ގަނޑުގައި ގަޑިއަކު 40 މޭލަށް ގަދަވެ ކަނޑުތައް ގަދަވާނެ ކަމަށް ލަފާކުރެވޭ ކަމަށެވެ.

މިރޭގެ މޫސުން ކުރިއަށް ލަފާކޮށް މޫސުމާ ބެހޭ އިދާރާއިން ބުނީ، ރާއްޖޭގެ ބައެއް ރަށްތަކަށޑ ވިއްސާރަކުރާނެ ކަަމަށާއި، ބައެއް ރަށްތަކަށް ގުގުރާނެ ކަމަށެވެ. އަދި ދެކުނުގެ ރަށްތަކަށް ބޯކޮށް ވާރޭވެހުން އެކަށީގެންވާ ކަަމަށްވެސް ބުނެފައިވެއެވެ.

މެޓުން ވަނީ ރާއްޖޭގެ ކަނޑުތައްވެސް ގަދަވާނެ ކަަަމަށްވެސް ލަފާ ކޮށްފައެވެ.

ހުޅަނގާއި ހުޅަނގުއުތުުރުން، ދެކުނުގެ އަތޮޅުތަކަށް ގަޑިއަކު 17 މޭލާއި 27 މޭލު ބާރުމިނުގައި ވައިޖެހޭނެ ކަމަށް މެޓުން ލަފާކުރެއެވެ. އަދި އެހެން ހިސާބުތަަކަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ ކަަމަށް އެ އިދާރާއިން ލަފާކޮށްފައި ވެއެވެ. އަދި ވިލާގަނޑުގައި ގާތްގަނޑަކަށް 45 މޭލު ބާރުމިނަަށް ވައި ގަދަވުން އެކަށީގެންވާ ކަމަށްވެސް ބުނެފައިވެއެވެ.