ސަރުކާރުގެ ދަނޑުވެރިކަމުގެ ކުންފުނި އެގްރޯ ނެޝަނަލް ކޯޕަރޭޝަން (އެގްރޯ ނެޓް) އުވާލުމުގައި މިހާރު ކުރިއަށްދަނީ ޓްރާންސިޝަންގެ މަސައްކަތްތައް ކަމަށް އެކުންފުނިން ހާމަކޮށްފިއެވެ.

ދަޢުލަތުގެ ކުންފުނިތައް ރިފޯމް ކުރުމަށް ކުރިއަށް ގެންދާ ޕްރޮގްރާމްގެ ދަށުން އެގްރޯ ނެޓް އުވާލައި، އެ ކުންފުނީގެ ދަށުން ކުރާ މަސައްކަތް މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީ ޒޯން (އެމްއައިޑީއެފްސީޒެޑް) ގެ ދަށަށް ގެންދަން ސަރުކާރުން ނިންމީ، މިދިޔަ ސެޕްޓެމްބަރު މަހު އެވެ.

އެގްރޯނެޓުން ބުނީ އެކުންފުނީގެ ޢާއްމު މަސައްކަތްތައް މިދިޔަ މަހުގެ 30 ގެ ފަހުން ހުއްޓާލާފައިވާ ކަމަށެވެ. އަދި މިވަގުތު ކުރިއަށްދަނީ ޓްރާންސިޝަނަލް މަސައްކަތްތައް ކަމަށްވެސް އެކުންފުނިން މަޢުލޫމާތުދެއެވެ.

ދިވެހި ސަރުކާރުގެ ސައްތައިންސައްތަ ހިއްސާވާ ގޮތަށް އެގްރޯ ނެޝަނަލް ކޯޕަރޭޝަން ލިމިޓެޑްގެ ނަމުގައި ކުންފުންޏެއް ރައީސް ޞާލިޙްގެ ވެރިކަމުގައި އުފެއްދީ ދަނޑުވެރިންގެ މަސައްކަތްތަކަށް ފަސޭހަކޮށްދީ ދަނޑުވެރިން ކުރާ މަސައްކަތާއި އެއްވަރުގެ އާމްދަނީއެއް ހޯދައިދިނުމުގެ ބޭނުމުގަ އެވެ.

އެގްރޯނެޓުން ދަނޑުވެރިންގެ އުފެއްދުންތައް ގަންނަން ފުރަތަމަ ހުޅުވާލުމާއެކު ދެހާހެއްހާ ދަނޑުވެރިން އެކަމަށް ޝައުގުވެރިކަން ފާޅުކުރި އެވެ. ނަމަވެސް ކުންފުނީގެ ޚިދުމަތްތައް ހުއްޓާލިއިރު އެ ކުންފުންޏާއެކު މުޢާމަލާތް ކުރަމުންދިޔައީ ނިސްބަތުން މަދު ދަނޑުވެރިއެއް ކަމަށް މަޢުލޫމާތު ލިބިފައިވެއެވެ.

ދަނޑުވެރިން ހައްދާ އުފެއްދުންތައް ގަނެގެން ގެނެސް ޖަމާކުރުމަށް ރާއްޖޭގެ އެކި ސަރަހައްދުތަކުން ނުވަ ރަށެއްގައި އެގްރި ސެންޓަރުތަކެއްވެސް އެކުންފުނިން އެޅިއެވެ. ނަމަވެސް އެސެންޓަރުތައްވެސް ބޭނުން ނުކުރުމުގެ ސަބަބުން މިހާރުވަނީ ވީރާނާވާން ފަށާފައެވެ.

މިވަގުތު އެ ކުންފުނީގައި 182 މުވައްޒަފުން މަސައްކަތް ކުރެއެވެ.