ހަންގަނޑުގައި ތެޔޮ އުފެދުމަކީ ވަރަށް ގިނަ މީހުންނަށް ދިމާވާ ކަމެކެވެ. އަދި މިކަމުގެ ސަބަބުން އެމީހުންނަށް ތަފާތު އެކި ސިއްހީ މައްސަލަތައްވެސް ކުރިމަތި ވެއެވެ. ނަމަވެސް ބައެއް ކަހަލަ ފޭސް މާސްކުތައް ބޭނުން ކުރުމުން މި މައްސަލަތައް ފަސޭހަކަމާއެކު ހައްލުވެ، މޫނުގެ ހަންގަނޑު ރީތިވެއެވެ.

ތިރީގައި މި ހިމަނާލަނީ ހަންގަނޑުގައި ތެޔޮ އުފެދޭނަމަ ބޭނުން ކުރުން ރަނގަޅު، ގޭގައި ފަސޭހަކަމާއެކު ތައްޔާރު ކޮށްލެވޭނެ މާސްކެކެވެ.

ކެލާ މާސްކު

ކެލާ އަކީ ޒަމާމުއްސުރެ މީހުން ހަންގަނޑު ރީތި ކުރުމަށްޓަކައި ބޭނުން ކުރަމުން އައިސްފައިވާ އެއްޗެކެވެ. މިއީ އެންޓިސެޕްޓިކް ސިފަތަކެއް ލިބިފައިވާ އެއްޗެއް ކަމުން މި ބޭނުން ކުރުމުން މޫނުގައި ހުންނަ ޖަރާސީމުތައް ނެތިގޮސް، މޫނުގައި އުފެދިފައި ހުންނަ ތެޔޮ ވެސް ނެތިދެއެވެ.

އަދި މި މާސްކު ތައްޔާރު ކުރާއިރު ކިރު އެޅުމުން މޫނުގައު ހުންނަ ޖަރާސީމުތަކާ ދެކޮޅަށް އިތުރަށް މަސައްކަތް ކޮށް، މޫނުގެ ހަންގަނޑުގައި ހުންނަ ޖަރާސީމުތައް ނައްތާލައެވެ. އަދި އޭގެ ސަބަބުން މޫނުގެ ހަންގަނޑު އަލިވެ ތާޒާވެއެވެ.

ކެލާ މާސްކު ތައްޔާރު ކުރާނީ ކިހިނެއް

މިއީ ވަރަށްް ފަސޭހަކަމާއެކު ތައްޔާރު ކުރެވޭ މާސްކެކެވެ. މި ތައްޔާރު ކުރުމަށް ބޭނުންވާނީ މާމުއި، ކިރު އަދި ކެލާ އެވެ. މި މާސްކު ތައްޔާރު ކުރުމަށް ބޯތައްޓެއްގެ ތެރެއަށް 2 މޭޒުމަތީ ސަމުސާ ކެލާ އެޅުމަށްފަހު އޭގެ ތެރެއަށް 2 ސައިސަމުސާ މާމުއި އަޅާށެވެ. އަދި އެއަށްފަހު ކުޑަ ކިރު ކޮޅެއް އަޅާފައި ހުރިހާ އެއްްޗެއް ރަނގަޅަށް އެއްކޮށްލާށެވެ. އަދި މި މާސްކު މޫނުގައި އުނގުޅުމަށްފަހު 20 މިނެޓު ފަހުން ތާފެނާ ފެނުން މޫނު ދޮވެލާށެވެ.

މިއީ ގޭގައި ފަސޭހަކަމާއެކު ތައްޔާރު ކުރެވޭ މާސްކަކަށް ވީއިރު، މިއިން ހަންގަނޑަށް ލިބޭ ފައިދާތައް އިންތިހާއަށް ގިނައެވެ. ވީމާ ސްކިން ކެއާ ރޫޓިން އަށް މި މާސްކު އިތުރު ކުރުމަކީ ރަނގަޅު ކަމެކެވެ.