އައްޑޫސިޓީގައި ސަރުކާރުން ގާއިމުކުރާ އިސްލާމީ މަރުކަޒުގެ މަސައްކަތް ކުރިއަށްދާ ގޮތް އިސްލާމީ ކަންތައްތަކާ ބެހޭ ވުޒާރާގެ ޓީމަކުން ބަލައިފިއެވެ.

މި މަސައްކަތް ކުރިޔަށްދާގޮތް ބެއްލުވުމަށް ވުޒާރާގެ ޓީމުގައި އިސްކޮށް ހުންނެވީ މާލޭގެ އިސްލާމީ މަރުކަޒުގެ އިސް އިމާމު އައްޝައިޚް މުހައްމަދު ލަތީީފެވެ. އައްޑޫ އިސްލާމީ މަރުކަޒުގެ މަސައްކަތް ކުރިއަށްދާ ގޮތަށް ވުޒާރާގެ ޓީމަކުން މި ބެލީ އައްޑޫގެ އިމާމުން ތާޒާ ކުރަން މި ހަފުތާގައި ބޭއްވި ޕްރޮގްރާމަށް ކުރި ދަތުރުގެ ތެރެއިންނެވެ.

މިއަދު ހެނދުނު އެ މަސައްކަތް ކުރިއަށްދާ ސައިޓަށް ވުޒާރާގެ ޓީމުން ގޮސް އިމާރާތުގެ މަސައްކަތް ކުރިއަށްދާ ގޮތާއި، މަސައްކަތް ކުރިއަށް ގެންދިއުމުގައި ދިމާވާ ދަތިތަކާއި ކުރިއަށް ހުރި މަސައްކަތްތަކާއި ގުޅޭ ގޮތުން މައުލޫމާތު ސާފުކުރިއެވެ.

އައްޑޫ އިސްލާމީ މަރުކަޒު ބިނާކުރަނީ ހިތަދޫ އަވަށުގައެވެ. އެތަން ބިނާކުރަނީ ހިތަދޫގައި ކުރިން ޕޮލިސް ޓްރެއިނިން ސްކޫލް ހުރި ތަނުގައެވެ.

އައްޑޫ އިސްލާމީ މަރުކަޒުގެ ކޮންޓްރެކްޓަރަކީ ފެޑޯ ޕްރައިވެޓް ލިމިޓެވެ. އެ ކުންފުންޏާ އެ މަޝްރޫއު ހަވާލުކުރީ މިދިޔަ އަހަރުގެ މާރޗް 24 ގައެވެ. އަދި އިސްލާމީ މަރުކަޒުގެ ބިންގާ އެޅީ މިދިޔަ އަހަރުގެ ޖުލައި 26 ގައެވެ. މިއީ 55.52 މިލިއަން ރުފިޔާ ހަރަދުކޮށްގެން ކުރިޔަށް ގެންދާ މަޝްރޫއުއެކެވެ.

ދެ ފަންގިފިލާ ހިމެނޭ އިސްލާމީ މަރުކަޒު އިމާރާތުގައި 1،500 މީހުންގެ ޖާގައިގެ ނަމާދުކުރާ ބަޔަކާއި 450 މީހުންގެ ޖާގައިގެ މަލްޓި ޕަރޕަސް ހޯލަކާއި ހަތަރު ކްލާސްރޫމާއި ދެ ސެމިނަ ރޫމްގެ އިތުރުން އިދާރީ އޮފީހާއި އިސްލާމިކް ލައިބްރަރީ އަދި ޕޭންޓްރީ ހިމެނޭނެއެވެ.

އިސްލާމީ ކަންތައްތަކާ ބެހޭ ވުޒާރާއިން ބުނާގޮތުގައި މި މަސައްކަތް އަންނަ އަހަރުގެ ޖޫން މަހަށް ނިންމާލެވޭނެއެވެ.