ސަރުކާރުން ގއ. ވިލިނގިލީގައި ތަރައްޤީކުރަމުން އަންނަ ވަޤުފް ޢިމާރާތުގެ މަސައްކަތް ބާރަށް ކުރިއަށްދާއިރު، މިހާރު ކުރިއަށްދަނީ ޢިމާރާތުގައި ސިމެންތި ޖެހުމުގެ މަރުޙަލާ ކަމަށް އިސްލާމީ ކަންތައްތަކާ ބެހޭ ވުޒާރާއިން ހާމަކޮށްފިއެވެ.

އެ ވުޒާރާއިން ސޯޝަލް މީޑިއާގައި ޙިއްޞާކުރި މަޢުލޫމާތުގައިވާ ގޮތުން، ވަޤުފްގެ ދާއިރާ ފުޅާކުރުމަށް ސަރުކާރުން ކުރިއަށްގެންދާ މި މުހިންމު މަޝްރޫޢުގެ ދަށުން ކުރެވެމުންދާ އެންމެހައި މަސައްކަތްތައް، ކަނޑައެޅިފައިވާ ތާވަލާ އެއްގޮތަ

ށް 2026 ވަނަ އަހަރުގެ ޑިސެންބަރު މަހުގެ ނިޔަލަށް އެއްކޮށް ނިންމައި ބޭނުންކުރަން ފެށޭނެއެވެ.

ޒަމާނީ ފެންވަރަށް ބިނާކުރާ މި ޢިމާރާތަކީ އެކި ބޭނުންތައް އެއްފަސްކޮށް ފުއްދައިދޭނެ "މަލްޓި-ޕާޕަސް" މަރުކަޒެކެވެ. އެގޮތުން، އިދާރީ އޮފީސްތަކާއި ވިޔަފާރިތަކަށް ޚާއްޞަ ޖާގަތަކުގެ އިތުރުން، ދިރިއުޅޭނެ އެޕާޓްމަންޓްތައް މި ޢިމާރާތުގައި ހިމެނެއެވެ. މިފަދަ ވަސީލަތްތަކުގެ އެހީގައި މި މަރުކަޒުން ދެމެހެއްޓެނިވި ބޮޑު އާމްދަނީއެއް ލިބިގެންދާނެ ކަމަށް ވަނީ ލަފާކުރެވިފައެވެ.

މި މަޝްރޫޢުގެ މައިގަނޑު މަޤްޞަދަކީ މިފަދަ ވަޤުފް ޢިމާރާތްތަކުން ލިބޭ މާލީ މަންފާ ސީދާ އެ ސަރަޙައްދެއްގެ ދީނީ ކަންކަމަށް ޚަރަދުކުރުމެވެ. މިގޮތުން ވިލިނގިލީގެ ޢިމާރާތުން ލިބޭ ފައިސާ ބޭނުންކުރާނީ އެ ރަށުގެ މިސްކިތްތައް މަރާމާތުކޮށް ބެލެހެއްޓުމަށާއި، ދީނީ ހޭލުންތެރިކަން އިތުރުކުރުމުގެ ޕްރޮގްރާމްތަކަށެވެ. އަދި އިސްލާމީ ކަންތައްތަކާ ބެހޭ ވުޒާރާގެ ލަފަޔާއި އިރުޝާދުގެ ދަށުން މި އާމްދަނީ ބެލެހެއްޓުމުގެ އެންމެ އިސް ދައުރެއް އަދާކުރާނީ ރަށު ކައުންސިލުން ކަމަށްވާތީ، މިއީ ލާމަރުކަޒީ ނިޒާމުގެ ތެރެއިން ކައުންސިލްތަކަށް މާލީ ބާރުވެރިކަން ލިބިގެންދާނެ ކަމެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅާ އެއްގޮތަށް ވަޤުފް ނިޒާމު ފުޅާކުރުމުގެ މަސައްކަތް މުޅި ރާއްޖެއަށް ފުޅާކުރުމަށް ސަރުކާރުން އަންނަނީ ތައްޔާރުވަމުންނެވެ. އެގޮތުން، ކުޅުދުއްފުށި ސިޓީ، އައްޑޫ ސިޓީ، ފުވައްމުލައް ސިޓީ އަދި ތިނަދޫ ސިޓީގެ އިތުރުން ވެރިރަށް މާލެއާއި ހުޅުމާލޭގައި ވެސް ފުޅާ ދާއިރާއެއްގައި ވަޤުފް ޢިމާރާތްތައް ތަރައްޤީކުރުމުގެ ޢަމަލީ މަސައްކަތްތައް ފެށުމަށް މިހާރު ވަނީ ތާވަލުކޮށްފައެވެ.