ސިކުނޑީގެ މަސައްކަތްތައް ފުރިހަމަ ކުރުމަށްޓަކައި ކެއުމުގައި ސިއްހަތަށް ފައިދާހުރި ބާވަތްތައް ހިމެނުމަކީ ވަރަށް މުހިންމު ކަމެކެވެ. ބައެއް ކަހަލަ ކާއެއްޗެހި ކެއުމުން ސިކުނޑީގެ މަސައްކަތައް ރަނގަޅުވެ، ކަންކަމަށް ސަމާލުކަން ދެވޭ މިންވަރު އިތުރުވެ، މީހާގެ ހަނދާން ގަދަވެއެވެ. އެހެންކަމުން މިފަހަރު މި ހިމަނާލަނީ ހަނދާން ވަރުގަދަ ކުރަން ބޭނުންވާނަމަ ކެއުމުގައި ހިމަނަންވީ ބައެއް ބާވަތްތަކެވެ.

ވޮލްނަޓު

ވޮލްނަޓަކީ އޭގައި ގިނަ އަދަދަކަށް އޮމެގާ 3 ފެޓީ އެސިޑާއި، އެންޓި އޮކްސިޑެންޓުތަކުގެ އިތުރުން ވިޓަމިން އީ ހިމެނޭ އެއްޗެކެވެ. މި މާއްދާތަކަކީ މީހާ އޮކްސިޑޭޓިވް ސްޓްރެސް އާ ދުރުކޮށްދީ ސިކުނޑި ދުޅަވުން ކުޑަކޮށްދޭ މާއްދާތަކެކެވެ. އެހެންކަމުން މި ބޭނުން ކުރުމުން ސިކުނޑީގެ މަސައްކަތްތައް ރަނގަޅުވެ، ކޮގްނިޓިވް މަސައްކަތްތައް ރަނގަޅުވެ، އޭގެ ސަބަބުން މީހާގެ ހަނދާން ގަދަވެއެވެ.

ބޮރޮކޮލީ

ބޮރޮކޮލީ އަކީ ގިނަ އަދަދަކަށް ވިޓަމިން ކޭ އެކުކެވޭ ބާވަތެކެވެ. މިއީ މީހާގެ ސިކުނޑީގެ މަސައްކަތްތައް ފުރިހަމަކޮށް، ހަނދާން ގަދަކުރުމުގައި އެހީވެދޭ މާއްދާއެކެވެ. މީގެ އިތުރުން ބޮރޮކޮލީ އަކީ އޭގައި އެކިކަހަލަ އެންޓި އޮކްސިޑެންޓުތަކާއި އެންޓި އިންފްލެމޭޓަރީ ސިފަތައް އެކުލެވޭ އެއްޗެއް ކަމުން މި ބޭނުން ކުރުމުން ފްރީ ރެޑިކަލްތަކުގެ ސަބަބުން މީހާގެ ސިކުނޑި ރައްކާތެރި ވެއެވެ. އަދި އޭގެ ސަބަބުންވެސް ހަނދާން ގަދަވެއެވެ.

ބަރަބޯ އޮށް

ބަރަބޯ އޮށަކީ އޭގައި ގިނަ އަދަދަކަށް ޒިންކު، މެގްނީޒިއަމް އަދި ކޮޕާ އެކުލެވޭ އެއްޗެކެވެ. މި ހުރިހާ މާއްދާއަކީވެސް ސިކުނޑީގެ މަސައްކަތްތައް އެންމެ ފުރިހަމަ ގޮތުގައި ކުރިއަށް ދިއުމަށް ވަރަށް ބޭނުންތެރި މާއްދާތަކެކެވެ. މި ބޭނުން ކުރުމުން އެއްޗެހި ދަސްވާ ވަރު އިތުރުވެ ހަނދާން ހުންނަ މިންވަރުވެސް އިތުރުވެއެވެ.