މިހާރުކުރަމުންދާ ވިއްސާރާގައި މާލޭގައި ފެންބޮޮޑުވެ ފެންހިންދުމާއި ވެލިބަސްތާ ޖެހުމުގެ މަސައްކަތް ކަމާގުޅުންހުރި އިދާރާތަކުން ފަށައިފިއެވެ.

އިއްޔެއިން ފެށިގެން މާލެއަށް ބޯވާރެއާއެކު ކުރަމުންދާ ވިއްސާރައިގައި މަގުތަކުގައި ފެންބޮޑޫވެ މުޅި މާލެ ވަނީ ފެނު އަޑީގައެވެ. މާލޭގައި ފެންބޮޑުވެފައިވާތީ، އެމްއެންޑީއެފުން އަންނަނީ ފެން ހިންދުމުގެ މަސައްކަތްްކުރަމުންނެވެ.

އެގޮތުން އެމްއެންޑީއެފުން ބުނެފައިވަނީ މާލޭގެ ފަސް ސަރަހައްދެއްގައި 16 ޕަންޕު ބަހައްޓައިގެން، ފެން ހިންދުމުގެ މަސައްކަތް، އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ސިފައިން ކުރަމުންދާ ކަމަށެވެ.

boakoh vaarey vehi mulhi Malé Fen bodu vejje pic.twitter.com/AJ5TR3QYpy

— Accidents in Maldives (@AccidentsMV) December 21, 2024

މާލޭގައި އެންމެ ބޮޑަށް ފެންބޮޑުވެފައިވާ ސަރަހައްދުތަކުގެ ތެރޭގައި ވެސްޓްޕާކު ސަރަހައްދާއި، އައިޖީއެމްއެޗް ސަރަހައްދާއި، ވިލިނގިލީ ފެރީ ޓަރމިނަލް ސަރަހައްދާއި، ދިރާގު ސަރަހައްދާއި، ޖެލީ ޕިއްޒާ ސަރަހައްދު ހިމެނޭ ކަމަށް އެމްއެންޑީއެފުން މަޢުލޫމާތު ދީފައިވެއެވެ.

އޭގެ އިތުރުން ގޭބިސީތަކަށް ފެންވަންނަމުންދާތީ އެހީތެރިކަން ފޯރުކޮށްދިނުމުގެ ގޮތުން ވެލިބަސްތާ ޖެހުމުގައި އެމްއެންޑީއެފް މާލޭ އޭރިއާ ކޮމާންޑްގެ ސިފައިން މިހާރުވަނީ ހަރަކާތްތެރިވާން ފަށައިފައެވެ.

އިއްޔެއިން ފެށިގެން މާލެއަށް އަންނަނީ މެދުނުކެނޑި ވާރޭ ވެހެމުންނެވެ. އަދި މުޅި މާލޭގައި ފެންބޮޑުވެ ޢާންމުންނަށާއި ދަތުރުފަތުރަށް ވަނީ ދަތިވެފައެވެ.

މި ހަފްތާ ބަންދުގައި މުޅި ރާއްޖެއަށްވެސް ވިއްސާރަވާނެކަމަށް ލަފާކޮށް، މޫސުމާބެހޭ ޤައުމީ އިދާރާއިން ވަނީ މޫސުމަށް ސަމާލުވުމަށް އިލްތިމާސްކޮށްފައެވެ.