ބަނޑުހައި ވުމުން ލުއިކާނާގެ ބާވަތްތައް ކައިއުޅޭ މީހުން އަޅުގަނޑުމެންގެ ތެރޭގައި މަދެއް ނޫނެވެ. މިގޮތަށް ކާ ލުއި ކާނާގެ ބާވަތްތަކުގެ ތެރޭގައި ގިނަ އަދަދަކަށް ޕްރޮޓީން ހިމެނޭ އެއްޗެހި ހިމެނޭނަމަ އޭގެ ސަބަބުން މުޅި ދުވަހު ކާއެއްޗެހި ކަވައިގަންނަވަރު ކޮންޓްރޯލު ކޮށްދީ، ގިނައިރު ބަނޑު ފުރިފައި ހުންނަ ކަމުގެ އިހުސާސް ކުރެވެއެވެ.

އަދި މީގެ އިތުރުން މީހާގެ ލޭގައި ހަކުރު ހުންނަ މިންވަރު ހަމައަކަށް އެޅި، ހަށިގަނޑުގައި ހަކަތަ ހުންނަ ވަރުވެސް އިތުރުވެއެވެ. ތިރީގައި މި ހިމަނާލަނީ ލުއި ކާނާގެ ގޮތުގައި ކާންވީ ބައެއް ޕްރޮޓީންގެ ބާވަތްތަކެވެ.

ރޯސްޓު ކޮށްފައި ހުންނަ ޗިކްޕީސް

ރޯސްޓު ކޮށްފައި ހުންނަ ޗިކްޕީސް އަކީ އޭގައި ގިނަ އަދަދަކަށް ޕްރޮޓީން އެކުލެވޭ އެއްޗެކެވެ. މި ކެއުމުން މީހާ ބަނޑުހައިވާ ވަރު ދައްވެ، އޭގެ ސަބަބުން މުޅި ދުވަހު ހަށިގަނޑަށް އެތެރެވާ ކެލޮރީތައްވެސް މަދުވެއެވެ. އަދި އޭގެ ސަބަބުން ބަރުދަން ވެސް ކޮންޓްރޯލު ކުރެވެއެވެ.

ދޮންކޭލާއި ނަޓްބަޓާ

މިއީ ކަސްރަތު ކުރުމުގެ ކުރިން ކެއުން ވަރަށް ރަނގަޅު ލުއިކާނާއެކެވެ. މިއީ ގިނަ އަދަދަކަށް ޕްރޮޓީން ހިމެނޭ އެއްޗެއް ކަމުން މި ކެއުމުން ހަށިގަނޑުގައި ހަކަތަ ހުންނަ ވަރު އިތުރުވެއެވެ. އަދި އޭގެ ސަބަބުން ވަރުބަލިވާވަރު މަދުވެ، މަސައްކަތްތަކަށް ސަމާލުކަން ދެވޭ ވަރުވެސް އިތުރުވެއެވެ.

ޕްރޮޓީންގެ ބާވަތްތައް މިގޮތަށް ލުއިކާނާގެ ގޮތުގައި ކެއުމުން އޭގެ ސަބަބުން މީހާގެ ބަރުދަންވެސް ވަރަށް ބޮޑަށް ކޮންޓްރޯލު ކުރެވެއެވެ. އަދި ތަފާތު އެކި ސިއްހީ މައްސަލަތަކުންވެސް މީހާ ދުރުވެއެވެ. ވީމާ ލުއި ކާނާ ކާހިތްވާނަމަ މިފަދަ ޕްރޮޓީން ހިމެނޭ ބާވަތްތައް ކެއުމުގައި ހިމަނަން ޖެހެއެވެ.

މަސްދަރު: ލައިވްމިންޓު