މާދަމާއިން ފެށިގެން ކުރިއަށް އޮތް ފަސް ދުވަހަށް ރާއްޖޭގެ މޫސުން ގޯސްވާނެތީ ރައްކާތެރިވުމަށް ގިނަ ފިޔަވަޅުތަކެއް އެޅުމަށް ނެޝެނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން ބުނެފި އެވެ.

އެންޑީއެމްއޭއިން މިއަދު ކުރި އިއުލާނެއްގައި ބުނީ ލަންކާގެ އިރުދެކުނުގައި އުފެދިފައިވާ ކޮޅިގަނޑާއި އެ ކޮޅިގަނޑާ ގުޅިފައިވާ ލޯޕްރެޝާ ޓްރަފުގެ ސަބަބުން ރާއްޖޭގެ ބޮޑު ބަޔަކަށް ކުރިއަށް އޮތް ފަސް ދުވަހު ބޯކޮށް ވާރޭވެހި ގުގުރައި ކަނޑުގަދަވެ އަދި އުދަ އެރުމުގެ ފުރުސަތު ވެސް އެބަ އޮތް ކަމަށެވެ.

އެހެންވެ ރައްކާތެރިވުމުގެ ގޮތުން ހަތް ފިޔަވަޅެއް އެޅުމަށް އެންޑީއެމްއޭއިން ވަނީ އިލްތިމާސްކޮށްފަ އެވެ.

އޭގޮތުން ގޭގޭގެ ދޮރުމަތީ ވެލިބަސްތާތައް ޖެހުމާއި އިލެކްޓްރޯނިކް ސާމާނުތައް ހިމެނޭހެން ގޭގައި ގެންގުޅޭ ތަކެތި ފެން ނުޖެހޭ އުސް ތަންތަނުގައި ބަހައްޓަން ވަނީ އިލްތިމާސްކޮށްފަ އެވެ.

އޭގެ އިތުރުން ފުރާޅު ވަޔާ އެއްލާލަފާނެ ކަމަށް ބެލެވޭނަމަ ވަލުން އައްސައި ބޭނުން ނުކުރާ ކަރަންޓް ސާމާނު ނިއްވާފައި ބަހައްޓަން ވަނީ އިލްތިމާސްކޮށްފަ އެވެ.

އަދި ކާޑުގެ ބާވަތްތަކާއި ޒަރޫރީ ބާވަތްތަކަށް ދަތިނުވާނެ ގޮތަށް ކަންކަން އިންތިޒާމްކޮށް އަދި ދަތުރުތައް ފެށުމުގެ ކުރިން މޫސުމާ ބެހޭ އެންމެ ފަހު މައުލޫމާތު ހޯދުމަށް ވެސް އެންޑީއެމްއޭއިން އިލްތިމާސްކޮށްފައި ވެއެވެ.