މިހާރު މާލެއަށް ކުރަމުންދާ ވިއްސާރާގެ ސަބަބުން މަގުމައްޗަށް ކުނި ނުނެރުމަށް ވޭސްޓް މެނޭޖްމަންޓް ކޯޕަރޭޝަން(ވެމްކޯ) އިން އިލްތިމާސްކޮށްފިއެވެ.

ވެމްކޯއިން ކުރި އިއުލާނެއްގައި ވަނީ ކުނި ނެގުމަށް ގޭގެއަށް ދާ މުވައްޒަފުންނަށް ފަސޭހައިން ކުނި ނެގޭނެ ގޮތަށް ބެހެއްޓުމަށާއި މަގުމައްޗަށް ކުނި ނުނެރެ ބެހެއްޓުމަށް އިލްތިމާސް ކޮށްފައެވެ. އަދި އެއްވެސް ގޭބިސީއަކުން ކުނި ނުގެންދެވި ހުރި ކަމުގައިވިޔަސް މަގުމައްޗަށް ކުނި ނެރުމުގެ ބަދަލުގައި ވެމްކޯގެ ހޮޓްލައިން 1666 އަށް ގުޅައިގެން އެ މައްސަލައެއް ހައްލުކުރުމަށް އެ ކޯޕަރޭޝަނުން އެދިފައިވެއެވެ.

މި އިއުލާނުގައި ވެމްކޯއިން ވަނީ ޓްރާންސްފަރ ސްޓޭޝަންތަކުން ޚިދުމަތް ހޯދާއިރު އެންމެހާ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމަށް ވެމްކޯގެ މުވައްޒަފުންގެ އިރުޝާދުތަކަށް ސަމާލުވުމަށް ވެސް އިލްތިމާސްކޮށްފައެވެ.

މިދުވަސްވަރު މާލެއަށް ކުރަމުންދާ ވިއްސާރައާއި ގުޅިގެން މާލޭގައި ފެންބޮޑުވެފައިވާއިރު މިކަމުގެ ސަބަބުން އާންމުންނަށް ދަނީ ގިނަ ގޮންޖެހުންތަކާ ކުރިމަތިވަމުންނެވެ. ފެން ހިއްކުމުގެ މަސައްކަތް ސަލާމަތީ ބާރުތަކުން ކުރަމުންދާއިރު މި ދަނޑިވަޅުގައި އާންމުންގެ އެއްބާރުލުން ދެއްވުމަށް ކަމާބެހޭ ފަރާތްތަކުން ދަނީ އިލްތިމާސްކުރަމުންނެވެ.