މާފުށީ ޖަލުގައި ގައިދީން ބަނޑުހައިހޫނުކަމުގެ ހަޅުތާލު ކުރަމުންދިޔަ ނަމަވެސް އެއްވެސް ގައިދީއަކު އެޑްމިޓް ނުކުރާކަމަށް މޯލްޑިވްސް ކަރެކްޝަނަލް ސާވިސްއިން ބުނެފިއެވެ.

ކަރެކްޝަނުން ބުނީ އެއްވެސް ގައިދީއަކު އަސާސީ ހައްގަކުން މަހުރޫމު ނުކުރާ ކަމަށެވެ. އަދި ޖަލުތަކުގެ ސަލާމަތާއި ރައްކާތެރިކަން ކަށަވަރުކުރުމަށާއި މަސައްކަތްތައް ހަރުދަނާކުރުމުގެ ގޮތުން ބައެއް އުސޫލުތަކަށް ބަދަލުގެނެވުނު ނަމަވެސް، އެ ހިދުމަތުގެ ބެލުމުގެ ދަށުގައިވާ ގައިދީންނާއި ބަންދު މީހުންނަށް ލިބެންޖެހޭ އެއްވެސް އަސާސީ އިނާޔަތެއް، ހިދުމަތެއް އުނިކުރެވިފައެއް ނުވާ ކަމަށްވެސް ކަރެކްޝަނުން ބުނެއެވެ.

މިހެން ކަރެކްޝަނުން ބުނެފައި މިވަނީ މާފުށީ ޖަލުގައި ގައިދީންތަކެއް ބަނޑުހައިހޫނުކަމުގެ ހަޅުތާލެއް ކުރަމުންދާތީ އެފަރާތްތަކުގެ ހައްގުތަކަށް އުނިކަން އަންނަ ގޮތަށް އަމަލުކުރާ ކަމަށް ކުރާ ތުހުމަތުތަކާ ގުޅިގެން އެކްސްގައި ކުރި ޕޯސްޓެއްގައެވެ.

ޖަލުގައި ތިބި ބައެއް ބަންދު މީހުންނަށް ފޯރުކޮށްދޭ ކާބޯތަކެތި ބައެއް ފަހަރު ނުނެގި ނަމަވެސް، ވިޔަފާރި އުސޫލުން ގަނެފައިވާ ތަކެތި އެމީހުން ބޭނުން ކުރަމުންދާކަމަށް ކަރެކްޝަނުން ބުނެއެވެ.

ގައިދީން ހަޅުތާލު ފެށިތާ ތިން ދުވަސް ވެފައިވާއިރު އޭގެ އިތުރުން އެއްވެސް ކަމަކާ ގުޅިގެން އެއްވެސް ބަންދު މީހެއްގެ ސިއްޙީ ހާލަތު ގޯސްވެ، ހޮސްޕިޓަލްގައި އެޑްމިޓްކޮށްގެން ހާއްސަ ފަރުވާއެއް ނުދޭ ކަމަށް ވެސް ކަރެކްޝަނުން ބުނެއެވެ.