ދަ ޑިމޮކްރެޓްސްގެ ވަގުތީ ރައީސްގެ މަގާމަށް މަޑަވެލި ދާއިރާގެ ކުރީގެ މެމްބަރު ހުސެއިން ފިރުޝާން އިންތިހާބުކޮށްފިއެވެ.

ފިރުޝާން އެ މަގާމަށް އިންތިހާބު ކޮށްފައިވަނީ އެ މަގާމުގައި ކުރިން ހުންނެވި އެ ޕާޓީގެ ރައީސް ޙަސަން ލަތީފު މަގާމުން އިސްތިއުފާ ދެއްވައި އެމްޑީޕީއަށް ބަދަލުވުމާއި ގުޅިގެން، މިރޭ ބޭއްވި އެ ޕާޓީގެ ނެޝަނަލް އެސެމްބަލީގައެވެ.

ޑިމޮކްރެޓްސްގެ އަސާސީ ގަވާއިދު ބުނާގޮތުން ޕާޓީގެ ރައީސް ނެތް ހާލަތެއްގައި ވަގުތީގޮތުން އެ މަގާމާއި ހަވާލުވާން ޖެހޭނީ 2 ނާއިބުންކުރެ މީހެކެވެ. އެހެންކަމުން ވަގުތީ ރައީސަކަށްވުމަށް މިރޭގެ ޖަލްސާގައި ފުރުސަތު ހުޅުވާލުމުން ދެ ނައިބުންކަމަށްވާ ފިރުޝާން އަދި އަލައިކާ އަދުނާނު ވަނީ ކުރިމަތިލައްވާފައެވެ.

އޭގެތެރެއިން ވަގުތީ ރައީސަކަށް އިންތިހާބުކުރާނެ މީހަކު ހޮވުމަށް ނެގި ވޯޓުން ފިރުޝާނަށް ލިބުނީ 29 ވޯޓެވެ. އަދި އަލައިކާއަށް 14 ވޯޓު ލިބުނުއިރު 1 ވޯޓު ބާތިލުވިއެވެ. ޖުމުލަ ވޯޓު ލާފައިވަނީ 44 މެންބަރުންނެވެ.

މިރޭގެ ޖަލްސާގައި ވަނީ ރައީސްގެ މަގާމަށް 50 ދުވަހުގެ ތެރޭގައި މީހަކު އިންތިހާބު ކުރަން ވެސް ފާސްކޮށްފައެވެ.

އެމްޑީޕީ ސަރުކާރުގައި އެ ސަރުކާރުގެ ކަންކަން ގޯސްވުމުންކަމަށް ބުނެ ރައީސް ނަޝީދު އިސްވެ ހުންނަވާ އެމަނިކުފާނާ އެކު އެމްޑީޕީން ނުކުތް އިސް މެންބަރުންތަކެއް އުފެއްދި ޑިމޮކްރެޓްސްގެ ލީޑަރިޝިޕްގައި ހިމެނޭ 4 މެންބަރަކު އެނބުރި އެމްޑީީޕީއަށް މިހާރު ވަނީ ބަދަލުވެފައެވެ. އަދި ރައީސް ނަޝީދު ވެސް މިވަގުތު އެއްވެސް ޕާޓީއެއްގެ ހަރަކާތެއްގައި އުޅުއްވަން ބޭނުންްފުޅު ނުވާކަމަށް މިއަދު ވަނީ ވިދާޅުވެފައެވެ.

ނަމަވެސް، އޮންލަައިންކޮށް މިރޭގެ ޖަލްސާގައި ރައީސް ނަޝީދު ބައިވެރިވެވަޑައިގެންނެވިއެވެ.