އިންޑިޔާގައި ކޮވިޑް-19 އަށް ޕޮޒިޓިވްވި މީހުންގެ އަދަދު 4 މިލިއަނަށްވުރެ ގިނަވެ، މިހާތަނަށް ކޮވިޑް-19 އަށް ޕޮޒިޓިވްވި މީހުންގެ އަދަދު 4 މިލިއަނަށް އެރި ތިންވަނަ ގައުމަކަށް އިންޑިޔާ ވެއްޖެއެވެ.

އިންޑިޔާގެ އިތުރުން މިހާތަނަށް ކޮވިޑް-19 އަށް ޕޮޒިޓިވްވި މީހުންގެ އަދަދު 4 މިލިއަނަށް އަރާފައި ވަނީ އެމެރިކާ އަދި ބްރެޒިލް އެވެ. އެމެރިކާގައި ކޮވިޑް-19 އަށް ޕޮޒިޓިވްވި މީހުންގެ އަދަދު މިހާރު ވަނީ 6.3 މިލިއަނަށް އަރާފައެވެ.

އިންޑިޔާގައި ދުވާލެއްގެ މައްޗަށް ކޮވިޑް-19 އަށް ޕޮޒިޓިވްވާ މީހުން ގިނަވެ، އެއްދުވަސް މަތިން 80،000 މީހުން ޕޮޒިޓިވް ވެފައިވާކަމަށްވެސް ރިކޯޑް ކުރެވިފައިވެއެވެ. މީގެ އިތުރުން ދުވާލެއްގެ މައްޗަށް މިބަލީގައި މަރުވާމީހުންގެ އަދަދު އިތުރުވެ 1000 އަށް އަރައިފައިވާކަމަށްވެސް އަރަބް ނިއުސްގައި ހާމަކޮށްފައިވެއެވެ. ި

އިންޑިޔާގައި ކޮވިޑް-19 އަށް ޕޮޒިޓިވްވި މީހުންގެ އަދަދު 3 މިލިއަނުން 4 މިލިއަނަށް އިތުވެފައިވަނީ އެންމެ 13 ދުވަސް ތެރޭގައެވެ.

އިންޑިޔާގެ ސަރުކާރުން މިބަލި ކޮންޓްރޯލް ކުރުމަށް މަސައްކަތް ކުރަމުންދާއިރު، އިންޑިޔާގެ ފަގީރު އަވަށްތަކަށްވެސް ކޮވިޑް-19 ފެތުރެމުންދާކަމަށް އިންޑިޔާ ސަރުކާރާ ހަވާލާދީ އަރަބް ނިއުސްގައި ހާމަކޮށްފައިވެއެވެ. އަދި މިސަރަހައްދުތަކަކީ ރަނގަޅު ސިއްހީ ނިޒާމެއް ގާއިމު ކުރެވިފައި ނުވާ ސަރަހައްދުތަކަށް ވުމުން ބަލި ކޮންޓްރޯލް ކުރުމަށް އިތުރު ގޮންޖެހުންތަކެއް ކުރިމަތި ވާ ކަމަށްވެސް އިންޑިޔާ ސަރުކާރުން ހާމަ ކުރެއެވެ.