އިނގިރޭސިވިލާތުގައި ކިޔަވަމުންދާ ދިވެހި ދަރިވަރުންގެ އެކޮމޮޑޭޝަން ބްލޮކް އަކަށް އަނެއްކާވެސް "ނަމްބަރ 9 ރޯޒްމަންޓް އެވެނިއު" ބޭނުން ކުރެވޭ ގޮތަށް ރައީސް ޑރ. މުހައްމަދު މުއިއްޒު ހަމަޖައްސަވައިފިއެވެ.

އެގައުމުގައި ކިޔަވުންދިޔަ ކުދިންގެ އެކޮމޮޑޭޝަން ބްލޮކެއްގެ ގޮތުގައި ބޭނުން ކުރަމުންދިޔަ، އަދި އެކުދިންނާދީއެއްގެ ގޮތުގައި އެކި ބައްދަލުވުންތައް ބާއްވަމުންދިޔަ "ނަމްބަރ 9 ރޯޒްމަންޓް އެވެނިއު" ވަނީ 2019 ވަނަ އަހަރު ހައިކޮމިޝަންގެ ބޭނުމަށް ނަގާފައެވެ.

އެހެންކަމުން އަލުން މި ޢިމާރާތަކީ އިނގިރޭސިވިލާތުގައި ކިޔަވަން ތިބޭ ކުދިންނަށް ބޭނުންކުރެވޭނެ ތަނެއްގެ ގޮތުގައި ރައީސް ވަނީ ހަމަޖައްސަވާދެއްވާފައެވެ. އަދި މިތަން އެގައުމުގައި ކިޔަވަމުންދާ ދަރިވަރުންގެ އެސޯސިއޭޝަންގެ ދަށަށް އަލުން ވަނީ ރަޖިސްޓްރީ ކޮށްފައެވެ.

ސަރުކާރުން ބުނީ މިއީ އެގައުމުގައި ކިޔަވަމުންދާ ދަރިވަރުންގެ ހިތްހަމަޖެހުމާއި އެކުދިންގެ ދުޅަހެޔޮކަން ކަށަވަރުކޮށް އެގައުމުގައި ކިޔަވަމުންދާ ދިވެހި ދަރިވަރުންގެ އިޖުތިމާޢީ ގުޅުންތައް ބަދަހިކުރުމުގެ ގޮތުން އެޅި މުހިންމު ފިޔަވަޅެއް ކަމަށެވެ.