ދުނިޔެމަތީގައި އުޅޭއިރު އުފާވެރި، ބާއްޖަވެރި ދިރިއުޅުމެއް ވޭތުކުރަން ކޮންމެ މީހަކުވެސް ބޭނުންވެއެވެ. އުފާވެރިކަމަކީ ދިރިއުޅުމުގެ ފެންވަރު ރަނގަޅު ކޮށްދޭ ކަމެކެވެ. ކަންމިހެން އޮތްއިރު، އެމީހެއްގެ އުފާވެރިކަމަކީ އެމީހެއްގެ އަތްމަތީގައިވާ ކަމެކެވެ. އެމީހެއްގެ ހިޔާލުތަކާއި އަމަލުތަކުގެ ސަބަބުން ދިރިއުޅުމުގެ އުފާވެރިކަން ކަނޑައަޅައިދޭނެއެވެ. ވީމާ ތިރީގައި މި ހިމަނާލަނީ އުފާވެރި ދިރިއުޅުމެއް ބޭނުންވާނަމަ ކުރަންވީ 5 ކަމެކެވެ.

ޝުކުރުވެރިވުން

ދިރިއުޅުމުގައި ހުރި ރަނގަޅު ކަންކަމާމެދު އަބަަދުވެސް ޝުކުރުވެރިވާން ޖެހެއެވެ. ކޮންމެ ދުވަހަކުވެސް އެކަންކަމާމެދު ވިސްނައި، ލިބިފައިވާ ނިއުމަތްތަކަށް ޝުކުރުވެރިވެވޭތޯ ބަލަން ޖެހެއެވެ. މިހެން ކަންތައް ކުރުމުން އެމީހެއްގެ ހިތުގައި އުފާވެރިކަމާއި ހިތްހަމަޖެހުން އިތުރުވެގެން ދެއެވެ.

އެހެން މީހުންނަށް އެހީތެރިވުން

އެހެންމީހުންނަށް އެހީތެރިވެ، ހެޔޮކަންތައް ކުރުމަކީ އުފާވެރިކަން އިތުރުވާނެ ކަމެކެވެ. ތިމާގެ ވަގުތާއި ހުނަރު ބޭނުންކޮށްގެން އެހެން މީހުންނަށް އެހީތެރިވެދިނުމުން އެހެން މީހުން ތިމާއަށް ގަދަރު ކުރާ ވަރު އިތުރުވެއެެވެ. އަދި މިކަމުގެ ސަބަބުން ތިމާއަށް އުފާވެރިކަން ލިބެއެވެ.

އިޖްތިމާއީ ގުޅުންތައް ބަދަހިކުރުން

ދުނިޔެމަތީގައި އުޅޭއިރު އާއިލާ މީހުން އަދި ރައްޓެހިންނާ އެކު ވަގުތު ހޭދަކޮށް، ގުޅުން ބަދަހި ކުރުމަކީ ވަރަށް މުހިންމު ކަމެކެވެ. މިފަދަ އިޖްތިމާއީ ގުޅުންތައް ބަދަހިވާނަމަ، މީހާގެ އިހުސާސްތަކާއި ހިޔާލުތައް ހިއްސާ ކުރާނެ ހެޔޮލަފާ މީހުން ކައިރީގައި ތިބޭނެއެވެ. އަދި މިކަމުގެ ސަބަބުންވެސް ދިރިއުޅުން އުފާވެރިވާނެއެވެ.

އަމާޒުތަކެއް ކަނޑައެޅުން

ދިރިއުޅުމަށް މާނަވީ އަމާޒުތަކެއް ކަނޑައަޅައި، އެ އަމާޒުތަކަށް ވާސިލުވުމަށް މަސައްކަތް ކުރުމަކީވެސް މުހިންމު ކަމެކެވެ. މިކަމުން ތިމާގެ ދިރިއުޅުމަށް މަގްސަދެއް ލިބި، ކުރިއެރުމާއި ކާމިޔާބީގެ އިހްސާސް ލިބޭނެއެވެ. އަދި މިކަމުގެ ސަބަބުން ދިރިއުޅުން އުފާވެރިވާނެއެވެ.

މައްސަލަަތަކަށް ހައްލު ހޯދުން



ދިރިއުޅުމުގައި ދިމާވާ ގޮންޖެހުންތަކާއި މައްސަލަތަކާއި ކުރިމަތިލައި، ހައްލު ހޯދުމަށް މަސައްކަތް ކުރުމަކީވެސް ކޮންމެހެން ކުރަންޖެހޭ ކަމެކެވެ. މިކަމުގެ ސަބަބުން އަމިއްލަ ނަފްސަށް އޮންނަ އިތުބާރު އިތުރުވެ، ދިރިއުޅުމުގެ ކަންކަމާ ކުރިމަތިލުމުގެ ގާބިލުކަން އިތުރުވާނެއެވެ. އަދި މީގެ ސަބަބުން ދިރިއުޅުން އުފާވެރިވާނެއެވެ.