އެމެރިކާއިން އީރާނަށް ވަރުގަދަ އަސްކަރީ ހަމަލާއެއް ދީފާނެ ކަމުގެ ބިރު ބޮޑުވެ، އީރާނުގެ ލީޑަރޝިޕުން މުޅި ގައުމު "ރަތް ސަމާލަށް" ގެނެސްފިއެވެ.

އީރާނުގެ އަސްކަރިއްޔާގެ ހުރިހާ ގޮފިތަކެއް ހިމެނޭހެން ބޭއްވި ކުއްލި ބައްދަލުވުމެއްގައި، ގައުމުގެ ދިފާއުގައި އެންމެ ފަހު މީހާއާ ޖެހެންދެން ހަނގުރާމަކުރުމަށް ވަނީ އަހުދުކަށަވަރު ކޮށްފައެވެ. މި ބައްދަލުވުމުގައި އީރާނުން ވަނީ އެ ގައުމުގެ އަތުގައި ހުރި އެންމެ ނުރައްކާތެރި ހަތިޔާރުތައް ތައްޔާރީ ހާލަތަށް ގެނެސް، ކަނޑާއި، ވައިގެ އަދި އެއްގަމު މަގުން ކުރިމަތިވެދާނެ ކޮންމެ ހަމަލާއަކަށް ފާރަވެރިވުމަށް އަމުރުކޮށްފައެވެ.

މަސްދަރުތަކުން ބުނާ ގޮތުގައި އެމެރިކާގެ އަސްކަރީ ސިފައިން މިހާރު ވަނީ އީރާނުގެ ވަށައިގެންވާ ސަރަހައްދުތަކުގައި އެތުރި، ހަނގުރާމައަށް ފުރިހަމައަށް ތައްޔާރުވެފައެވެ. މި ވަގުތު އެމެރިކާގެ ސިފައިން މަޑުކޮށްގެން ތިބީ ރައީސް ޑޮނަލްޑް ޓްރަމްޕްގެ ފަރާތުން ހަމަލާދިނުމުގެ ފަހުގެ ހުއްދަ ލިބޭނެ ވަގުތަކަށެވެ.

މީގެ ރައްދުގައި އީރާނުން ބުނެފައިވަނީ އެމެރިކާއަކީ ދުނިޔޭގެ އެންމެ ބޮޑު ބާރު ކަމުގައި ވިޔަސް، ގައުމުގެ މިނިވަންކަމަށްޓަކައި ސާބިތުކަމާއެކު ކުރިމަތިލާނެ ކަމަށެވެ.

ނުރަސްމީ މަސްދަރުތަކުން ބުނާ ގޮތުގައި ހަނގުރާމަ ފެށިއްޖެ ހާލަތެއްގައި އީރާނުން މުޅިން އާ ތަފާތު ހަތިޔާރުތަކެއް ބޭނުންކުރުން އެކަށީގެންވެއެވެ.

ވަކިން ހާއްސަކޮށް އީރާނުން އުފައްދާ ހައިޕާސޮނިކް މިސައިލްތަކުގެ އަދަދު މިހާރު ވަނީ ވަރަށް ބޮޑަށް އިތުރުކޮށްފައެވެ. އަސްކަރީ ދިރާސާ ކުރާ ފަރާތްތަކުން ލަފާކުރާ ގޮތުގައި މި ހަނގުރާމައިގެ ސަބަބުން އެންމެ ބޮޑު ގެއްލުމެއް ލިބޭނީ އިސްރާއީލަށެވެ. އަދި އިސްރާއީލަށް ނުކަތާވަރުވުމުން ހަނގުރާމައިގެ ޕްލޭން ބަދަލުކުރުމަށް އެމެރިކާއަށް މަޖުބޫރުވެދާނެ ކަމަށްވެސް އެ ފަރާތްތަކުން ބުނެއެވެ.

އީރާނުގެ އަސްކަރިއްޔާއިން ސާފުކޮށް ބުނެފައިވަނީ، އެއްވެސް ފަރާތަކުން މެދުވެރިވެގެން ހަނގުރާމަ ހުއްޓާނުލާނެ ކަމަށާއި، މި ކުރިމަތިލުން ކުރިއަށްދާނީ ދެ ގޮތަކުން ކުރެ އެއް ގޮތެއް ވަންދެން ކަމަށެވެ. އެއީ ނަސްރު ލިބުން ނުވަތަ ޝަހީދުވުމެވެ. މަސްދަރުތަކުން ބުނާ ގޮތުގައި ކުރިއަށް އޮތް ކުޑަ ވަގުތުކޮޅެއްގެ ތެރޭގައި ޓްރަމްޕް ހަމަލާގެ ހުއްދަ ދިނުން ވަރަށް ގާތެވެ.