ކުރިއަށް އޮތް އިންތިޚާބާ ދިމާކޮށް ސަރުކާރުން ރައްޔިތުންގެ "ލޮލުގައި އަދުން އެޅުވުމަށް" މަސައްކަތް ކުރަމުންދާ ކަމަށް ވިދާޅުވެ، ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް ނަސީމް ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.

އެމްޑީޕީ ހަރުގޭގައި ބޭއްވި ޖަލްސާއެއްގައި ވާހަކަދައްކަވަމުން މީކާއިލް ވިދާޅުވީ، ރާއްޖޭގެ އުމްރާނީ ތަރައްޤީ ގުޅިފައިވަނީ ހަމައެކަނި ސަރުކާރުގެ ކެންޑިޑޭޓުން ހޮވުމާ ކަމަށް ބުނެ ސަރުކާރުން ދައްކަމުންދަނީ ހަގީގަތާ ޚިލާފު ވާހަކަތަކެއް ކަމަށެވެ. މީކާއިލް ފާހަގަކުރެއްވި ގޮތުގައި މި އިންތިޚާބަކީ އެމްޑީޕީގެ ގިނަ މެންބަރުންތަކެއްގެ ބުރަ މަސައްކަތުން އުފެއްދި ޖަވާބުދާރީކުރުވަނިވި ދައުލަތުގެ ނިޒާމު ދެމެހެއްޓުމަށް ލިބޭނޭ އެންމެ ފަހުގެ ފުރުސަތެވެ.

އިލެކްޝަންސް ކޮމިޝަނުގެ މިހާރުގެ ހާލަތާ މެދު ކަންބޮޑުވުން ފާޅުކުރައްވަމުން މީކާއިލް ވިދާޅުވީ، އެ ކޮމިޝަނުގެ ރައީސް ރައީސުލްޖުމްހޫރިއްޔާއާއެކު ސިއްރު ބައްދަލުވުންތައް ބާއްވަންޖެހޭ އެއްވެސް ސަބަބެއް އޮތް ކަމަށް ގަބޫލުނުކުރެއްވޭ ކަމަށެވެ. މިއީ ދިވެހިރާއްޖޭގެ ގާނޫނުއަސާސީ ތަސައްވަރުކުރާ ގޮތް ނޫންކަން ފާހަގަކުރައްވައި، އޭނާ ވިދާޅުވީ އިލެކްޝަންސް ކޮމިޝަނަކީ ރައީސުލްޖުމްހޫރިއްޔާއަށް ޖަވާބުދާރީވާންޖެހޭ މުއައްސަސާއެއް ނޫން ކަމަށާއި، އެ ކޮމިޝަން ޖަވާބުދާރީވާން ޖެހޭނީ ސީދާ ރައްޔިތުންގެ މަޖިލީހަށް ކަމަށެވެ.

މީގެ އިތުރުން، ލޯކަލް ކައުންސިލް އިންތިޚާބު ފަދަ މުހިންމު ކަންކަން ވިލަރެސްކުރާ މުއައްސަސާގެ މިނިވަންކަން ގެއްލޭ ގޮތަށް އަމަލުކުރުމަކީ ބަލައިގަނެވޭނޭ ކަމެއް ނޫން ކަމަށްވެސް މީކާއިލް ވިދާޅުވިއެވެ. އޭނާ އިތުރަށް ވިދާޅުވީ، މި އިންތިޚާބަށް ކުރިމަތިލާއިރު މިނިވަން މުއައްސަސާތަކުގެ މައްޗަށް ސަރުކާރުގެ ނުފޫޒު އޮތް މިންވަރު މިއަދު ރައްޔިތުންނަށް ވަރަށް ސާފުކޮށް ފެންނަން އޮތް ކަމަށެވެ.