ގައްޒާގައި ކުރިއަށްދާ ހަނގުރާމައިގައި ފަލަސްތީނުގެ 70،000 އަށްވުރެ ގިނަ މީހުން ޝަހީދުވެފައިވާ ކަމަށް ބުނެ ގައްޒާގެ ހެލްތު މިނިސްޓްރީން ނެރެމުންދާ ތަފާސްހިސާބުތަކަކީ ސައްހަ އަދަދުތަކެއް ކަމަށް އިސްރާއީލްގެ އަސްކަރިއްޔާއިން ފުރަތަމަ ފަހަރަށް ގަބޫލުކޮށް އެކަމަށް އެއްބަސްވެޖެއެވެ.

އިސްރާއީލްގެ ނޫހެއް ކަމަށްވާ "ހާއާރެޓްޒް" އިން ރިޕޯޓްކޮށްފައިވާ ގޮތުގައި، މީގެ ކުރިން މި އަދަދުތަކާ މެދު ސުވާލު އުފައްދަމުން ދިޔަ ނަމަވެސް، މިހާރު އިސްރާއީލްގެ އަސްކަރިއްޔާއިން ވަނީ އެ މިނިސްޓްރީގެ ހިސާބުތަކަކީ އިތުބާރު ހުރި ހިސާބުތަކެއް ކަމަށް ބަލައިގެންފައެވެ.

މި ރިޕޯޓުގައި ފާހަގަކޮށްފައިވާ ގޮތުގައި، 70،000 އަށްވުރެ ގިނަ މީހުން މަރުވެފައިވާ ކަމަށް އެއްބަސްވާއިރު، މީގެ ތެރޭގައި އިމާރާތްތަކުގެ ބައިތަކުގެ ދަށުވެ ގެއްލިފައިވާ މީހުންގެ އަދަދުތަކެއް ނުހިމެނެއެވެ. އެހެންކަމުން، ހަނގުރާމައިގައި މަރުވި މީހުންގެ ހަގީގީ އަދަދު މިއަށްވުރެ މާ މަތިވާނެކަމަށް ބެލެވެއެވެ. ހާއާރެޓްޒްއިން އިތުރަށް ބުނެފައިވަނީ، އިސްރާއީލްގެ ޖާސޫސީ އިދާރާތަކުންވެސް މިހާރު ގަބޫލުކުރާ ގޮތުގައި ގައްޒާގެ ސިއްހީ ވުޒާރާގެ ތަފާސްހިސާބުތަކަކީ މައިގަނޑު ގޮތެއްގައި ކަން ހިނގާފައިވާ ގޮތާ އެއްގޮތް ހިސާބުތަކެކެވެ.

މި އެއްބަސްވުމަކީ ބައިނަލްއަގުވާމީ މުޖުތަމައުގެ ފިއްތުންތަކާއި، ގައްޒާގައި ހިނގަމުންދާ އިންސާނީ ކާރިސާގެ ބޮޑުކަން ހާމަވަމުންދާ ދަނޑިވަޅެއްގައި އިސްރާއީލުން ނިންމި ނިންމުމެކެވެ.

ހަނގުރާމަ ފެށުނީއްސުރެ އިސްރާއީލުން ދިޔައީ ގައްޒާގެ ހެލްތު މިނިސްޓްރީއަކީ ހަމާސްގެ ކޮންޓްރޯލް އޮންނަ ތަނެއް ކަމަށް ބުނެ، އެތަނުން ނެރޭ މަރުގެ އަދަދުތަކަކީ ދޮގު މަޢުލޫމާތުތަކެއް ކަމަށް ބުނަމުންނެވެ. ނަމަވެސް، މިހާރު އިސްރާއީލްގެ އަސްކަރިއްޔާގެ އަމިއްލަ ތަހުގީގުތަކުންވެސް ވަނީ އެ އަދަދުތައް ކަށަވަރުވެފައެވެ.