ބެންގަލޫރުގެ އެންޓި ކޮރަޕްޝަން ބިއުރޯއިން ޕޮލިސް ސްޓޭޝަނުގެ އިންސްޕެކްޓަރު ރޭންކުގެ ފުލުހަކު ރިޝްވަތު ހިފަނިކޮށް ކުށުގެ ވެށިން ހައްޔަރުކޮށްފިއެވެ.

އެމައްސަލަގައި ހައްޔަރުކުރީ ބެންގަލޫރުގެ ކޭ.ޕީ އަގްރަހާރު ޕޮލިސް ސްޓޭޝަންގެ އިންސްޕެކްޓަރ ގޯވިންދަރާޖޫއެވެ. އޭނާ ހައްޔަރުކުރީ އިމާރާތްކުރުމުގެ ދާއިރާގައި މަސައްކަތްކުރާ މީހެއްގެ އަތުން 4 ލައްކަ ރުޕީސް ރިޝްވަތުގެ ގޮތުގައި ނަގަނިކޮށް މިދިޔަ ބުދަ ދުވަހުގެ ހަވީރުގެ ވަގުތެއްގައެވެ.

މީޑިޔާ ރިޕޯޓްތައް ބުނާގޮތުގައި މި އޮޕަރޭޝަން ހިންގާފައިވަނީ އިމާރާތްކުރުމުގެ ދާއިރާގައި މަސައްކަތްކުރާ މުޙައްމަދު އަކްބަރު ނަމަކަށް ކިޔާ މީހަކު ހުށަހެޅި ޝަކުވާއަކާ ގުޅިގެންނެވެ. އަކްބަރުގެ މައްޗަށް ތުހުމަތު ކުރެވުނު މަކަރާއި ހީލަތް ހެދުމުގެ މައްސަލައަކުން އޭނާގެ ނަން އުނިކޮށްދީ، މައްސަލައިގައި ލުއިތަކެއް ހޯދައިދޭނެ ކަމަށް ބުނެ އިންސްޕެކްޓަރ ގޯވިންދަރާޖޫ ރިޝްވަތުގެ ގޮތުގައި ޖުމްލަ 5 ލައްކަ ރުޕީސްއަށް އެދިފައިވާ ކަމަށް މީޑިޔާ ރިޕޯޓް ތައް ބުނެއެވެ.

މި މައްސަލައިގެ ތަފްސީލަށް ބަލާއިރު، އަކްބަރު ވަނީ މީގެ ކުރިން 2026 ޖެނުއަރީ 24 ވަނަ ދުވަހު ސިރްސީ ސާކަލް ސަރަހައްދުން އެ ފުލުސް މީހާއަށް 1 ލައްކަ ރުޕީސް ދީފައެވެ. އަދި ބާކީ އޮތް 4 ލައްކަ ރުޕީސް ހަވާލުކުރުމަށް ޗާމަރާޖްޕެޓް ސީ.އޭ.އާރް ގްރައުންޑަށް އައުމަށް އިރުޝާދުދީ އިންސްޕެކްޓަރުވަނީ އިރުޝާދުދީ އެތަނަށް ގޮސްފައެވެ.، އެންޓި-ކޮރަޕްޝަން ބިއުރޯއިން އެ ފުލުސް އިންސްޕެކްޓަރު އަތުލައިގެންފައިވަނީ އެމީހާ އަތުން އެ ފައިސާއާ ހަވާލުވަމުން ދަނިކޮށް ރެޑްހޭންޑްކޮށެވެ.

ކޮރަޕްޝަނާ ދެކޮޅަށް ހިންގި މި ޚާއްޞަ އޮޕަރޭޝަނުގައި އޭނާ ހައްޔަރުކުރަން އުޅުމުން، އަމިއްލަ ނަފްސު ދިފާއުކުރުމަށާއި އާންމުންގެ ހަމްދަރުދީ ހޯދުމުގެ ގޮތުން އިންސްޕެކްޓަރ ގޯވިންދަރާޖޫ ވަނީ އެ ސަރަހައްދުގައި ބާރަށް ހަޅޭއްލަވައި އަޑުގަދަކޮށްފައެވެ. ނަމަވެސް، ތަހުގީގީ އޮފިސަރުން ވަނީ އެކަށީގެންވާ ހެއްކާއެކު އޭނާ އެ އިދާރާގެ ބެލުމުގެ ދަށަށް ގެންގޮސްފައެވެ. އޭނާގެ މައްޗަށް ރިޝްވަތާއި ނުފޫޒުގެ ބޭނުންކޮށްގެން ބިރުދެއްކި ކަމުގެ ތުހުމަތުގައި މިހާރުދަނީ އިތުރަށް ތަހުގީގު ހިންގަމުންނެވެ.