ދޮގު މައުލޫމާތާއި މުޖުތަމައުގައި ފިތުނަފަސާދަ އުފެދޭ ފަދަ އެންމެހައި ކަންކަމުން މީޑިއާތަކުން ދުރުހެލިވެ، ގައުމީ މަސްލަހަތު އިސްކުރުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ) އިން މިއަދު އިލްތިމާސްކޮށްފިއެވެ.

އެ ކޮމިޝަނުން މިކަމަށް އިލްތިމާސްކުރީ މިއަދު ފާހަގަކުރަމުންދާ ރާއްޖޭގެ ބްރޯޑްކާސްޓިން ދުވަހުގެ މުނާސަބަތުގައި ނެރުނު ހާއްސަ ނޫސްބަޔާނެއްގައެވެ.

އެމްއެމްބީސީގެ ބަޔާނުގައި ފާހަގަކޮށްފައިވާ ގޮތުގައި، ބްރޯޑްކާސްޓަރުންނަކީ ގައުމުގެ އިޖުތިމާއީ، އިގުތިސާދީ އަދި ސިޔާސީ ހޭލުންތެރިކަން އިތުރުކުރުމުގައި މުހިންމު ދައުރެއް އަދާކުރާ ބައެކެވެ. އެހެންކަމުން، އިސްލާމީ ރިވެތި އަހުލާގާއި ދިވެހި ގައުމިއްޔަތާއި ސަގާފަތް ނެގެހެއްޓުމާ އެކު، މުޖުތަމައަށް ސައްހަ އަދި އިތުބާރުހުރި މައުލޫމާތު ފޯރުކޮށްދިނުމުގައި ޒިންމާދާރުވުމަކީ ކޮންމެހެން މުހިންމު ކަމެއް ކަމަށް އެ ކޮމިޝަނުން ބުނެފައިވެއެވެ.

ރާއްޖޭގެ ބްރޯޑްކާސްޓިން ދާއިރާގެ ދިގު ތާރީޚަށް އަލިއަޅުވާލަމުން ކޮމިޝަނުން ބުނީ، 29 ޑިސެމްބަރު 1962 ގައި "މާލެ ރޭޑިއޯ" ގެ ނަމުގައި ފެށުނު މި އަގުހުރި ޚިދުމަތް، ސެނެކޯ ރޭޑިއޯ، އެމްއައިބީއެސް، އަދި ރޭޑިއޯ މޯލްޑިވްސްގެ ތެރެއިން ގޮސް 1980 ގައި "ދިވެހިރާއްޖޭގެ އަޑު" ގެ ނަމުގައި ފުޅާވެގެން ދިޔަ ކަމަށެވެ. އަދި 1978 ގައި ޓެލެވިޜަން މޯލްޑިވްސް އުފެދި، 2007 ވަނަ އަހަރު އަމިއްލަ ފަރާތްތަކަށް މި ދާއިރާ ހުޅުވާލުމަކީ ލިބުނު ބޮޑު ކުރިއެރުމެއް ކަމަށް ވެސް ބަޔާންކޮށްފައިވެއެވެ.

މީގެއިތުރުން، 2010 ވަނަ އަހަރު އަމަލުކުރަން ފެށި ބްރޯޑްކާސްޓްކުރުމުގެ ގާނޫނަށްފަހު، މިދިޔަ އަހަރުގެ ސެޕްޓެމްބަރު މަހުގެ 18 ވަނަ ދުވަހު ތަސްދީގުކުރެވުނު މީޑިއާ އަދި ބްރޯޑްކާސްޓިން ރެގިއުލޭޝަން ގާނޫނުގެ ދަށުން އެމްއެމްބީސީ އުފެދި، މި ދާއިރާއަށް ޒަމާނީ އައު ދައުރެއް ފެށިފައިވާކަން އެ ކޮމިޝަނުން ފާހަގަކުރިއެވެ. މިހާރު ރާއްޖޭގައި 37 ބްރޯޑްކާސްޓަރުންނާއި 29 ރީބްރޯޑްކާސްޓަރުން ޚިދުމަތް ދެމުން އަންނަކަން ވެސް އެ ބަޔާނުގައި ފާހަގަކޮށްފައިވެއެވެ.

އެމްއެމްބީސީން އިތުރަށް ބުނީ، ޒަމާނީ ޓެކްނޮލޮޖީއާ އެކު ދާއިރާ ކުރިއަރުވައި، މީޑިއާތަކުގައި މަސައްކަތްކުރާ ފަރާތްތަކުގެ ހައްގުތައް ރައްކާތެރިކުރުމަށާއި، ފަންނީ ގާބިލުކަން އިތުރުކުރުމަށް ކުރަންޖެހޭ މަސައްކަތްތައް ހުއްޓުމެއްނެތި ކުރިއަށް ގެންދާނެ ކަމަށެވެ. އަދި ގާނޫނާއި ގަވާއިދުގެ ތެރެއިން މިނިވަން އަދި ޒިންމާދާރު ބްރޯޑްކާސްޓިން ވެއްޓެއް ގާއިމުކުރުމަށް އެ ކޮމިޝަނުން އަބަދުވެސް ބާރުއަޅަމުންދާނެ ކަމުގެ ޔަގީންކަން ވަނީ ދީފައެވެ.