ކުރީގެ ސަރުކާރުތަކުން ނަގާފައިވާ ބޮޑެތި ދަރަނިތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދައްކަވައިދެއްވުމަކީ ދެކޮޅު ނެހެދޭނެ ހަގީގަތެއް ކަމަށާއި، އެކަމުގެ ސަބަބުން އިދިކޮޅު ފަރާތްތަކަށް ވެސް ހިތްހަމަޖެހުން ލިބިފައިވާ ކަމަށް ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ ޕީއެންސީ މެންބަރު އިބްރާހީމް މުޙައްމަދު (ޖަނާބު އިއްބެ) ވިދާޅުވެއްޖެއެވެ.

މެންބަރު އިބްރާހީމް މުޙައްމަދު މިހެން ވިދާޅުވީ މިއަދު އެކްސްގައި ހިއްސާކުރެއްވި ޕޯސްޓެއްގައެވެ.

އޭނާގެ ޕޯސްޓުގައި ވިދާޅުވެފައިވަނީ، ރައީސް ޑރ. މުޢިއްޒު މިހާރު ގެންދަވަނީ ކުރީ ސަރުކާރުތަކުން ނަގާފައިވާ ބޮޑެތި ދަރަނިތައް ދައްކަވައި، ޤައުމުގެ އިޤްތިޞާދީ ޙާލަތު ހަމަމަގަށް އަޅުއްވަމުން ކަމަށެވެ. އަދި މިއީ އެއްވެސް ފަރާތަކަށް އިންކާރު ކުރެވެން ނެތް ސާފު ހަގީގަތެއް ކަމަށް އޭނާ ފާހަގަކުރެއްވިއެވެ.

"ދެކޮޅު ނެހެދޭނެ ފެކްޓަކީ ރައީސް ޑރ. މުހައްމަދު މުޢިއްޒު އެވަނީ ކުރީ ސަރުކާރު ތަކުން ނެގި ބޮޑެތި ދަރަނިތައް ދައްކައިދީފައިކަން. ޔަޤީން. އަދި އެ ހިތްހަމައެޖެހުން އިދިކޮޅުގައިވެސް އެބޮތް. އެކަމާ ދަރަނި ނެގި މީހުންވެސް މިއަދު އުފާވޭ. އެއްްބަސްވާން އެކަނި ބޭނުން ނުވަނީ،" ޖަނާބު ވިދާޅުވިއެވެ.

ޖަނާބު އިތުރަށް ފާހަގަކުރެއްވި ގޮތުގައި، ދަރަނިތައް ދައްކަމުންދާތީ އެކަމުގެ ހިތްހަމަޖެހުމާއި އުފާވެރިކަން ކުރީގައި ދަރަނި ނެގި ފަރާތްތަކަށް ވެސް ލިބެމުންދާ ކަމަށެވެ. ނަމަވެސް ސިޔާސީ ސަބަބުތަކަށްޓަކައި އެ ހަގީގަތް ޤަބޫލުކޮށް، އެއްބަސްވާން އެ ފަރާތްތަކުން ބޭނުންނުވަނީ ކަމަށް އޭނާ ވިދާޅުވިއެވެ.

ދިވެހިރާއްޖޭގެ މާލީ ޙާލަތު ރަނގަޅުކޮށް، ބޭރުގެ ޤައުމުތަކަށާއި މާލީ އިދާރާތަކަށް ދައްކަންޖެހޭ ދަރަނިތައް ޤަވާއިދުން ދެއްކުމަށް ސަރުކާރުން ދަނީ ގިނަގުނަ މަސައްކަތްތަކެއް ކުރަމުންނެވެ.