އީރާނުގެ ރޫޙީ ލީޑަރު، އާޔަތުއްﷲ ޢަލީ ހާމަނާއީ އަވަހާރަވުމާ ގުޅިގެން، އެކަން ދިވެހި ސަރުކާރުން ރަސްމީކޮށް ކުށްވެރިކޮށްފައި ނުވާތީއާއި، އެ ހިތާމައިގައި ބައިވެރިވެވަޑައިނުގެންނެވި ސަބަބު ހާމަކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެކޮޅު ހައްދަވައިފިއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، "ދައުރު" ނޫހުގެ ނޫސްވެރިޔާ މުޒައްޔިން ކުރި ސުވާލަށް ސީދާ ޖަވާބެއް ނުދެއްވައި، ރައީސް ވިދާޅުވީ މެދުއިރުމަތީގައި މިހާރު ހިނގަމުންދާ ހަނގުރާމައިގައި ދެފަރާތުން ދެމުންދާ ހަމަލާތައްވެސް ރާއްޖެއިން ކުށްވެރިކުރާ ކަމަށެވެ.

ރައީސް މުޢިއްޒު އިތުރަށް ވިދާޅުވީ، ދިވެހިރާއްޖެ އަބަދުވެސް އޮންނާނީ ޢަރަބި އިސްލާމީ ޤައުމުތަކާއި އެކުގައި ކަމަށާއި، ރާއްޖެއިން މަސައްކަތް ކުރަމުންދަނީ އެ ޤައުމުތަކާ އެކު އެއް ރޫޙެއްގައި ކަމަށެވެ. އަދި ބައިނަލްއަޤުވާމީ މައިދާނުގައި ރާއްޖެއިން ގެންގުޅެނީ ވަރަށް އެކުވެރި އަދި އުޚުއްވަތްތެރި ގުޅުމެއްގެ ތެރެއިން ކުރިއަށްދާ ސިޔާސަތެއްކަން އެމަނިކުފާނު ފާހަގަކުރެއްވިއެވެ. ނަމަވެސް، ހާމަނާއީ އަވަހާރަވުމާ ގުޅިގެން ރާއްޖެއިން ވަކި އެއްޗެއް ވިދާޅުނުވި ސަބަބާ ގުޅޭގޮތުން ނޫސްވެރިން ތަކުރާރުކޮށް ސުވާލު ކުރުމުންވެސް، އެކަމަށް ސީދާ ޖަވާބެއް ދެއްވާފައެއް ނުވެއެވެ.

މީގެ އިތުރުން، "27 އޮންލައިން" ގެ ނޫސްވެރިޔާ އާދަމް ނަޒީރު، ހާމަނާއީ އަވަހާރަވުމަކީ އިސްލާމީ އުއްމަތަށް ލިބުނު ބޮޑު ހިތާމައެއް ނޫންތޯއާއި، އެކަމުގައި ތަޢުޒިޔާ ވިދާޅުނުވީ ކީއްވެތޯ ސުވާލު ދެންނެވުމުންވެސް ރައީސް ވަނީ އެ ސުވާލަށް ޖަވާބު ދެއްވުމަށް އުޒުރުވެރިވެވަޑައިގެންފައެވެ.

އެމަނިކުފާނު ތަކުރާރުކޮށް ވިދާޅުވަމުން ގެންދެވީ، މި ސަރުކާރުގެ ޚާރިޖީ ސިޔާސަތު ބިނާވެފައިވަނީ ޢަރަބި އިސްލާމީ އުއްމަތުގެ ސަފުތަކާ އެކު ސާބިތުވެ އޮތުމުގެ މައްޗަށް ކަމަށެވެ.