އިސްލާމީ ގައުމެއްގެ އެންމެ މަތީ ވެރިޔަކު އަވަހާރަވެއްޖެނަމަ، ރާއްޖޭގެ ގައުމީ ދިދަ ބައިދަނޑިއަށް ތިރިކުރުމަކީ ޒަމާނުއްސުރެ އަމަލުކުރަމުން އަންނަ ރީތި އުސޫލެއް ކަމަށް ވިދާޅުވެ، ކުރީގެ ޚާރިޖީ ވަޒީރު ދުންޔާ މައުމޫން ސަރުކާރަށް ވަރުގަދަ ފާޑުކިޔުމެއް އަމާޒުކުރައްވައިފިއެވެ.

އީރާނުގެ ރޫހާނީ ލީޑަރު އާޔަތުﷲ އަލީ ޚާމަނޭއީ އަވަހާރަކޮށްލުމާ ގުޅިގެން ސަރުކާރުން އެކަށީގެންވާ ފެންވަރެއްގައި ހިތާމަ ފާޅުކޮށްފައި ނުވާތީ، ދުންޔާގެ އިތުރުން އާންމުންގެ ގިނަ ބަޔަކުވެސް ދަނީ ކަންބޮޑުވުން ފާޅުކުރަމުންނެވެ.

ދުންޔާ ވިދާޅުވީ، އިސްލާމީ އުންމަތުގެ ލީޑަރަކު އަނިޔާވެރި ހަމަލާއެއްގައި ޝަހީދުކޮށްލުމުން ވެސް، ދިވެހި ސަރުކާރުގެ ފަރާތުން މިކަމާ ގުޅޭ ސީދާ ބަހެއް ލިބިފައި ނުވުމަކީ ހިތާމަހުރި ކަމެއް ކަމަށެވެ.

އިސްލާމީ ޤައުމެއްގެ އެންމެމަތީ ވެރިޔާ އަވަހާރަ ވެއްޖެނަމަ ރާއްޖޭގެ ޤައުމީދިދަ ބައިދަނޑިއަށް ތިރިކުރުމަކީ ޒަމާނުއްސުރެ ރާއްޖޭގައި ޢަމަލު ކުރަމުން އަންނަ ރީތި އުޞޫލެއް.!

— Dunya Maumoon (@dunyamaumoon) March 1, 2026

އީރާނުގެ ރޫޙީ ލީޑަރ ޝަހީދު ކޮށްލާފައިވާއިރު، ސަރުކާރުގެ މަތީ ފަންތިން މިކަމުގައި އީރާނަށް ޙަމްދަރުދީ ފާޅުކޮށްފައި ނުވާތީ އާންމުންގެ މެދުގައި ވަނީ ސުވާލުތައް އުފެދިފައެވެ.

މި ހާދިސާއާ ގުޅިގެން ސަރުކާރުން ނެރުނު ބަޔާނުގައި "ހުރިހާ ފަރާތްތަކަކުން ކެތްތެރިވުމަށް" ބުނެފައި އޮތުމަކީ، އަސްލު އަނިޔާވެރިވި އިޒްރޭލާއި އެމެރިކާގެ ނަން ބޭނުންކުރަން ސަރުކާރުން ބިރުގަތުން ކަމަށް ގިނަ ބަޔަކު ތުހުމަތުކުރެއެވެ. މަސްރަހު ދިރާސާކުރާ ފަރާތްތަކުން ބުނަމުންދަނީ، ސަރުކާރުގެ މި ހިމޭންކަމުން ހާމަވަނީ ބޭރުގެ ނުފޫޒާއި ސިޔާސީ މަސްލަހަތު ސަރުކާރަށް ބޮޑުވެފައި އޮތް މިންވަރު ކަމަށެވެ.