ރައީސުލްޖުމްހޫރިއްޔާ ޑރ. މުޙައްމަދު މުއިއްޒަކީ ވަރަށް ބޮޑު "ފިނޑިއެއް" ކަމަށް ސިފަކުރައްވައި، އެމަނިކުފާނު ވަގުތުން މަގާމުން އިސްތިއުފާ ދެއްވުމަށް ކުރީގެ މިނިސްޓަރު މުޙައްމަދު މަލީޙް ޖަމާލް ގޮވާލައްވައިފިއެވެ.

މަލީޙް މިހެން ވިދާޅުވީ މިއަދު ބޭއްވި ނޫސްވެރިންގެ ބައްދަލުވުމުގައި ރައީސް މުއިއްޒު ދެއްކެވި ވާހަކަފުޅުތަކަށް ރައްދު ދެއްވައި، މީސްމީޑިއާގައި ކުރެއްވި ޕޯސްޓެއްގައެވެ. މަލީޙް ވިދާޅުވީ، މިއަދުގެ ޕްރެސް ކޮންފަރެންސުން ރައީސް މުއިއްޒަކީ ބޮޑު ފިނޑިއެއްކަން ހާމަވެގެން ގޮސްފައިވާ ކަމަށެވެ.

ޚާއްޞަގޮތެއްގައި، އިސްލާމީ ގައުމެއްގެ ވެރިއަކު އަވަހާރަކޮށްލުމާ ގުޅިގެން، އެންމެ ކުޑަމިނުން ސާފު ދިވެހިބަހުން ތައުޒިޔާ ވިދާޅުވާންވެސް ރައީސަށް ކެރިވަޑައިނުގެންނެވި ކަމަށް މަލީޙް ފާހަގަކުރެއްވިއެވެ. އަދި ނޫސްވެރިން އެދެމުންދިޔަ ފަދައިން، އެކަން ކުށްވެރިކުރަންވެސް ރައީސަށް ކެރިވަޑައިނުގެންނެވި ކަމަށް އޭނާ ވިދާޅުވިއެވެ.

އޭގެ އިތުރުން މަލީޙް ވިދާޅުވީ، މިވަރުގެ ފިނޑި ބޭފުޅަކަށް ގައުމުގެ ވެރިކަން ނުކުރެއްވޭނެ ކަމަށާއި، އެހެންކަމުން މިހާރުން މިހާރަށް ރައީސް މުއިއްޒު އިސްތިއުފާ ދެއްވަން ޖެހޭ ކަމަށެވެ.

Muizz akee bodu findi eh kan miadhuge press in haama vejje. Islaamee qaumegge veriyaku avahaarakohleema emme kuda minun saafu Dhivehi bahun thauziyaa kiyanves nukerunu. Noosverin kiyajehey goiy laadhineemaves nukerunu.Thivaruge findiyakah verikan nukureveyne. Isthiufaa dhehvaa.

— Mohamed Maleeh Jamal (@maleehjamal) March 2, 2026

މަލީޙް މިހެން ވިދާޅުވެފައިވާއިރު، އެމެރިކާއާއި އިޒްރޭލުން އީރާނަށް ޙަމަލާ ދެމުންދާއިރު އީރާނުން ގެންދަނީ މެދުއިރުމަތީގެ ޤައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ޙަމަލާ ދެމުންނެވެ. މެދުއިރުމަތީގެ މަސްރަހު މިހާރު އޮތް ނުތަނަވަސް ހާލަތުގައި، އިޒްރޭލުގެ އަމަލުތައް ކުށްވެރިކޮށް ދިވެހި ރައްޔިތުން ވެސް ގެންދަނީ އަޑުއުފުލަމުންނެވެ.

އީރާނުގެ ރޫޙާނީ ލީޑަރ ޝަހީދު ކޮށްލުމާ ގުޅިގެން ސަރުކާރުގެ ފަރާތުން މިހާތަނަށް ރަސްމީކޮށް އެއްވެސް އެއްޗެއް ބުނެފައެއް ނުވެއެވެ. އަދި އިޒްރޭލުން އީރާނަށް ދެމުންދާ ޙަމަލާތައް ކުށްވެރި ކުރުމުގައި ސަރުކާރުން ފަހަތުފަޔަށް ބުރަ ވެފައިވާކަމަށް މީސްމީޑިއާގައި ގިނަ ބަޔަކު ދަނީ ބުނަމުންނެވެ.