މެދުއިރުމަތީގައި މިހާރު ހިނގަމުންދާ ހަމަނުޖެހުންތަކާއި ހަނގުރާމަތަކަށް ރިއާޔަތްކޮށް، ދިވެހިރާއްޖޭގައި އިންޑިޔާގެ އަސްކަރީ ސިފައިން ތިބުމަކީ ގައުމަށް އޮތް ބޮޑު ނުރައްކަލެއް ކަމަށް ކުރީގެ ހޯމް މިނިސްޓަރު އަދި ކުރިއަށް އޮތް ރިޔާސީ އިންތިޚާބުގައި ވާދަކުރައްވާނެކަން އިއުލާނު ކުރައްވާފައިވާ އުމަރު ނަސީރު ވިދާޅުވެއްޖެއެވެ.

އުމަރު ނަސީރުގެ އެކްސް (ކުރީގެ ޓުވިޓަރ) އެކައުންޓުގައި އާންމުކުރެއްވި ލިޔުމެއްގައި ވިދާޅުވެފައިވަނީ، މެދުއިރުމަތީގެ ހަނގުރާމައިގައި އެމެރިކާގެ އަސްކަރީ މަރުކަޒުތަކާއި އާލާތްތައް ހުރި ގައުމުތަކަށް، އެ ގައުމުތަކުން ހަނގުރާމައިގައި ސީދާ ބައިވެރިނުވި ނަމަވެސް ހަމަލާތައް އަމާޒުވަމުންދާ ކަމަށެވެ. މިއީ ރާއްޖޭގައި ތިބި ބޭރުގެ ސިފައިންނާ މެދު ފުންކޮށް ވިސްނާލަންވީ ވަގުތު ކަމަށް އުމަރު ފާހަގަކުރެއްވިއެވެ.

އުމަރު ވިދާޅުވި ގޮތުގައި، އިންޑިޔާއާއި އެހެން ގައުމަކާ ދެމެދު ބޮޑު ހަނގުރާމައެއް ފެށިއްޖެ ހާލަތެއްގައި، ރާއްޖޭގެ ތިން ސަރަހައްދެއްގައި ގާއިމުވެތިބި އިންޑިޔާގެ ސިފައިންނާއި އެމީހުންގެ އަސްކަރީ އާލާތްތައް ހުރި ރަށްތަކަށް ހަމަލާދޭނެކަމީ ކަށަވަރު ކަމެކެވެ. މިފަދަ ހާލަތެއް މެދުވެރިވެއްޖެނަމަ، އެ ހަނގުރާމައިގައި ރާއްޖޭގެ އެއްވެސް ބައިވެރިވުމެއް ނެތް ނަމަވެސް، އެތައް ދިވެހިންނެއްގެ ފުރާނަ ގެއްލި، ގެދޮރު ސުންނާފަތިވެ، ބިންތައް ބޭނުންނުކުރެވޭ ވަރަށް ހަލާކުވެގެންދާނެ ކަމުގެ އިންޒާރު އޭނާ ދެއްވިއެވެ.

މީގެ އިތުރުން، މިފަދަ ނުރައްކާތެރި ހާލަތެއްގައި ރާއްޖޭގެ އިގްތިސާދުގެ މައިނާރު ކަމަށްވާ ޓޫރިޒަމް އާއި އެހެނިހެން ސިނާއަތްތަކަށް އިއާދަނުކުރެވޭ ވަރުގެ ބޮޑެތި ގެއްލުންތަކެއް ލިބިގެންދާނެ ކަމަށްވެސް އުމަރު ފާހަގަކުރެއްވިއެވެ.

"އިންޑިޔާގެ އަސްކަރިއްޔާ ރާއްޖޭގައި އޮތުމަކީ، މި ގައުމުގެ މިނިވަންކަމަށާއި، އަމަންއަމާންކަމަށާއި އަމިއްލަވަންތަކަމަށް އޮތް ނުރައްކަލެއް،" އުމަރު ނަސީރު ލިޔުއްވާފައިވެއެވެ.

އުމަރުގެ ލިޔުން ނިންމާލައްވަމުން ވިދާޅުވެފައިވަނީ، ރާއްޖޭގެ ސަލާމަތާއި ރައްކާތެރިކަމަށްޓަކައި އިންޑިޔާގެ ސިފައިންނާއި އެމީހުންގެ އަސްކަރީ އާލާތްތައް ރާއްޖެއިން ފޮނުވާލުމަކީ ކޮންމެހެން ކުރަންޖެހޭ ކަމެއް ކަމަށެވެ.