ރައްޔިތުންގެ މަޖިލީހުގެ އިންތިޚާބާއި ރިޔާސީ އިންތިޚާބު އެއްކޮށްލުމަށް ސަރުކާރުން ހުށަހަޅާފައިވާ ހުށަހެޅުމާ މެދު ކުރީގެ ރައީސް އިބްރާހިމް މުޙައްމަދު ޞާލިހް ވަނީ ވަރަށް ބޮޑަށް ފާޑުވިދާޅުވެފައެވެ.

އެމްޑީޕީން ރޭ ބޭއްވި ހަރުގެ ޖަލްސާގައި ވާހަކަފުޅު ދައްކަވަމުން ޞާލިހް ވިދާޅުވީ، ޑިމޮކްރެޓިކް ނިޒާމެއްގައި ފަސް އަހަރުން އެއްފަހަރު އިންތިޚާބެއް ބޭއްވުމަށް 60 މިލިއަން ނުވަތަ 100 މިލިއަން ރުފިޔާ ޚަރަދުކުރަން ޖެހުނު ނަމަވެސް، އެއީ ބޮޑު އަދަދެއް ނޫން ކަމަށެވެ. އަދި އިންތިޚާބުތައް އެއްކޮށްލުމަށް ރައްޔިތުންގެ ފެންނަ ނުފެންނަ ވޯޓަކަށް ދާއިރު، އެކަމުގެ "ވާނުވާ" ރައްޔިތުންނަށް ސާފުނުވާ ކަމަށް އެމަނިކުފާނު ފާހަގަކުރެއްވިއެވެ.

ސަރުކާރުން ޚަރަދު ކުޑަކުރުމުގެ ބަހަނާގައި މަސައްކަތް ކުރަނީ ރައްޔިތުންގެ މަޖިލީހުގެ ދައުރު ކުރުކުރަން ކަމަށް ތުހުމަތު ކުރައްވަމުން ޞާލިހް ވިދާޅުވީ، ގާނޫނުއަސާސީއަށް މިފަދަ ބޮޑު ބަދަލެއް ގެންނަންވާނީ ފުޅާ ދާއިރާއެއްގައި ބަހުސްކޮށް، ކަމާބެހޭ ފަރާތްތަކުގެ މަޝްވަރާ ހޯދުމަށްފަހު ކަމަށެވެ. 18 އަހަރުވީ ގާނޫނުއަސާސީގެ މާއްދާއެއް އިސްލާހު ކުރަންޖެހޭ ސަބަބު ރައްޔިތުންނަށް ބުނެދޭން ޖެހޭނެ ކަމަށާއި، މިހާރު ކަންކަން ކުރިއަށްދާ ގޮތުން ރައްޔިތުންނަށް އެކަމުގެ އެއްވެސް ތަފްސީލެއް އެނގިފައި ނުވާ ކަމަށް އެމަނިކުފާނު ވިދާޅުވިއެވެ.

މީގެ އިތުރުން، ދެ އިންތިޚާބު އެއްކޮށްލުމުން ސަލާމަތް ކުރެވޭނެ ކަމަށް ސަރުކާރުން ބުނާ 50 މިލިއަން ރުފިޔާއަކީ ގައުމީ ފެންވަރުގެ ކަމަކަށް ބަލާއިރު ކުޑަ އަދަދެއްކަން ޞާލިހް ފާހަގަކުރެއްވިއެވެ.

އެމަނިކުފާނު ވިދާޅުވި ގޮތުގައި، 60 މިލިއަން ރުފިޔާ އިންތިޚާބަކަށް ހޭދަވާނަމަ، އެއީ އަހަރަކަށް 12 މިލިއަން ރުފިޔާއެވެ. އަދި އެއީ މަހެއްގެ މައްޗަށް އެންމެ މިލިއަނެއްހާ ރުފިޔާ ކަމަށްވާއިރު، ޑިމޮކްރެޓިކް ހަމަތައް ހިފެހެއްޓުމަށް އެއީ ބޮޑު ޚަރަދެއް ނޫން ކަމަށް އެމަނިކުފާނު ވަނީ ވިދާޅުވެފައެވެ.