އީރާނާއި އިޒްރޭލާ ދެމެދު އުފެދިފައިވާ ހަނގުރާމައިގެ ހިތި ހަގީގަތަކީ އޭގެ ނޭދެވޭ އަސަރު ދިވެހިރާއްޖެއަށް ކުރާނެ ކަންކަމަށް ވިދާޅުވެ، ރައްޔިތުން މިހާރުން މިހާރަށް ރައްކާތެރިކަމުގެ ފިޔަވަޅު އެޅުމަށް މަޝްހޫރު އިގްތިސާދީ މާހިރު، ނަފާ ނަސީމް ގޮވާލައްވައިފިއެވެ.

އޭނާގެ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވީ، މި ކުރިމަތިލުމުގެ ސަބަބުން ކުރިމަތިވެދާނެ ދަތިތަކަށް ބަލަން ސަރުކާރުން ފިޔަވަޅެއް އަޅަންދެން މަޑުނުކޮށް، އަމިއްލަ ފަރުދީ ފެންވަރުގައި ރައްޔިތުން އިސްނަގައިގެން މަސައްކަތް ފަށަންޖެހޭ ކަމަށެވެ.

ނަސީމް އިތުރަށް ވިދާޅުވީ، ދުނިޔޭގެ މަސްރަހަށް އަންނަ މިފަދަ ބޮޑެތި ބަދަލުތަކާއެކު ރާއްޖެ ފަދަ އިމްޕޯޓަށް ބަރޯސާވާ ގައުމަކަށް ހާލުގައި ޖެހުމުގެ ބިރު އެބައޮތް ކަމަށެވެ.

އެހެންކަމުން، ކަރަންޓު ބޭނުންކުރުން މަދުކުރުމަށާއި، އުޅަނދުފަހަރު ދުއްވުން މަދުކޮށް ތެލަށް ކުރާ ހޭދަ ކުޑަކުރުމުގެ އިތުރުން، ކެއިންބުއިމުގެ ޚަރަދުތައް ވެސް ވީހާވެސް ބޮޑަށް އިގްތިސާދު ކުރުމަށް އޭނާ އިލްތިމާސް ކުރެއްވިއެވެ. "އަވަހަށް ކެތްތެރިވެ ކަމަރުބަނދެލާ" މިފަދައިން ވިދާޅުވެ، އޭނާ ވަނީ ކުރިމަތިވެދާނެ ތަދުމަޑުކަމަކަށް ތައްޔާރުވުމަށް ބާރުއަޅުއްވާފައެވެ.

މީގެ އިތުރުން، ބޭރުގެ އެހީތެރިކަމަށް އެދިގެން ތިބުމުގެ ބަދަލުގައި އަމިއްލަ ފައިމައްޗަށް ތެދުވުމުގެ މުހިންމުކަން ފާހަގަކުރައްވަމުން ނަސީމް ވިދާޅުވީ، ހާލުގައި ޖެހޭ ވަގުތު އެހީތެރިވާން އެހެން ބަޔަކު ނާންނާނެ ކަމަށެވެ. މި ހާލަތަކީ ސީރިއަސް ހާލަތެއްގެ ގޮތުގައި ދެކި، ކޮންމެ އާއިލާއަކުން ވެސް އިސްރާފު ކުޑަކޮށް، ކުރިއަށް އޮތް ދަތި ދުވަސްތަކަށް ތައްޔާރުވުމަކީ މިއަދު ކުރަންޖެހިފައިވާ އެންމެ މުހިންމު މަސައްކަތް ކަމުގައި އޭނާ ފާހަގަކުރެއްވިއެވެ.