ސަރުކާރުން ޚަރަދު ކުޑަކުރުމުގެ ނަމުގައި އުމުރުން ދުވަސްވީ މީހުންނަށް ދެމުންދާ 5،000 ރުފިޔާގެ އިނާޔަތް ކަނޑާލުމަށް މަސައްކަތް ކުރަމުންދާ ކަމަށް ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ތުހުމަތު ކުރައްވައިފިއެވެ.

އިދިކޮޅު އެމްޑީޕީން ބޭއްވި ޚާއްސަ ޖަލްސާއެއްގައި ވާހަކަދައްކަވަމުން ޑރ. ޝަމްހީދު ވިދާޅުވީ، ސަރުކާރުން ޚަރަދު ކުޑަކުރަން މަސައްކަތް ކުރަނީ ރައްޔިތުންގެ ތަރައްގީއަށާއި މުސާރައަށް ކަނޑައަޅާފައިވާ ބަޖެޓުން ފައިސާ އުނިކޮށްގެން ކަމަށެވެ. އެގޮތުން، އުމުރުން 65 އަހަރުން މަތީގެ މީހުންނަށް ދޭ އިނާޔަތް ކަނޑާލުމަށް މަޖިލީހަށް މިހާރު ބިލެއް ހުށަހަޅާފައިވާ ކަމަށް އޭނާ ވިދާޅުވިއެވެ.

"އެމްޑީޕީ އިން އެންމެ ފަޚުރުވެރިވާ އެއް ކަމަކީ 65 އަހަރުވާ މީހުންނަށް އެމްޑީޕީ ސަރުކާރުން ދޭން ފެށި 2000 ރުފިޔާ. މިއަދު އެއީ 5000 ރުފިޔާ. އެ އުނި ކޮށްލަން މިއަދު އެބައިން މަޖިލީހަށް ބިލެއް ހުށަހަޅާފަ. ކޮން ރައްޔިތަކަށްތޯ އެނގެނީ މިކަން ހުށަހަޅާފަ އޮތްކަން." ޑރ. ޝަމްހީދު ވިދާޅުވިއެވެ.

މީގެ އިތުރުން ޑރ. ޝަމްހީދު ވިދާޅުވީ، އިންތިޚާބުތައް މަދުކޮށްގެން ޚަރަދު ކުޑަކުރަން ސަރުކާރުން ކުރާ މަސައްކަތުގެ ސަބަބުން ރަށްރަށުގެ ތަރައްގީ ހުއްޓޭނެ ކަމަށެވެ. އަދި ރަށްރަށުގެ ތަރައްގީގެ މަޝްރޫއުތައް ހުއްޓުމަކީ ސަރުކާރުން ޚަރަދު ކުޑަކުރަން ގެންގުޅޭ ސިޔާސަތެއް ކަމަށް އޭނާ ފާހަގަކުރެއްވިއެވެ.

އޭގެ އިތުރުން ޑރ. ޝަމްހީދު ވިދާޅުވީ، ސަރުކާރުން ޚަރަދު ކުޑަކުރަން މި އުޅެނީ ރައްޔިތުންގެ ތަރައްގީއާ ރައްޔިތުންނަށް ސީދާ ގޮތުން ލިބޭ މަންފާތަކުން ކަމަށްވާތީ، މި ސިޔާސަތުތަކާ މެދު ދިވެހި ރައްޔިތުން ފުންކޮށް ވިސްނަންޖެހޭ ކަމަށެވެ.

މި ސަރުކާރުގެ ޚަރަދު ކުޑަކުރުމުގެ ސިޔާސަތުތަކަށް އިދިކޮޅު ފަރާތްތަކުން ފާޑުކިޔަމުންދާއިރު، ރައީސް ޑރ. މުހައްމަދު މުއިއްޒުގެ ސަރުކާރުން ބުނަމުންދަނީ އިގްތިސާދީ އިސްލާހީ ފިޔަވަޅުތައް އަޅަމުންދަނީ ގައުމުގެ މާލީ ހާލަތު ރަނގަޅު ކުރުމަށް ކަމަށެވެ.