ރާއްޖެ ޓްރާންސްޕޯޓް ލިންކު (އާރުޓީއެލް) ފެރީގެ ހިދުމަތް މުލަކަތޮޅު (މ. އަތޮޅު) އަދި ހައްދުންމަތީގައި (ލ. އަތޮޅު) ފެށުމަށް ވާންޖެހޭ އެންމެ ފަހުގެ ތައްޔާރީތައް ވަމުންދާ ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އެވިއޭޝަން މުހައްމަދު އަމީން ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރު އަމީން ވިދާޅުވީ، ސަރުކާރުގެ އަމާޒަކީ މި ހިނގާ މާޗް މަސް ނިމުމުގެ ކުރިން މި ދެ އަތޮޅުގައި ހައި ސްޕީޑް ފެރީގެ ހިދުމަތް ރަސްމީކޮށް ފެށުން ކަމަށެވެ. މިކަމަށްޓަކައި ކުރަންޖެހޭ އިދާރީ އަދި ފަންނީ މަސައްކަތްތައް ބާރުސްޕީޑުގައި ކުރިއަށްދާކަން މިނިސްޓަރު ފާހަގަކުރެއްވިއެވެ.

އާރުޓީއެލްގެ ހިދުމަތް އެންމެ ފަހުން ފަށާފައިވަނީ ފާފު އަތޮޅާއި ދާލު އަތޮޅުގައެވެ. އެ ދެ އަތޮޅުގައި ތަޖުރިބާގެ ދަތުރުތައް ނިންމާލުމަށްފަހު، މިހާރު ދަނީ އަގު ނަގައިގެން ދާއިމީކޮށް ހިދުމަތް ދެމުންނެވެ. ފ އަތޮޅާއި ދ އަތޮޅާއެކު މިހާތަނަށް ރާއްޖޭގެ 14 އަތޮޅެއްގެ 133 ރަށެއް ވަނީ އާރުޓީއެލް ފެރީގެ ވިއުގައަކުން ގުޅާލެވިފައެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ނިންމާފައިވަނީ ދަތުރުފަތުރުގެ މި ނިޒާމު މުޅި ރާއްޖެއަށް ފުޅާކުރުމަށެވެ. އެގޮތުން، މިއަހަރުގެ ޖޫން މަސް ނިމުމުގެ ކުރިން ރާއްޖޭގެ ހުރިހާ އަތޮޅަކަށް އާރުޓީއެލްގެ ހިދުމަތް ދީ ނިންމުމަކީ ސަރުކާރުގެ މުހިންމު އަމާޒެކެވެ.

މި ހިދުމަތް މީމާއި ލާމަށް ތައާރަފްވުމާއެކު، އެ އަތޮޅުތަކުގެ ރައްޔިތުންނަށް އެއްރަށުން އަނެއްރަށަށް ދަތުރުފަތުރު ކުރުމުގައި މިހާރު ކުރިމަތިވާ ދަތިތަކަށް ބޮޑު ލުޔެއް ލިބި، އިގްތިސާދީ އަދި އިޖުތިމާއީ ގޮތުން ބޮޑެތި ކުރިއެރުންތަކެއް ލިބިގެންދާނެއެވެ.