ދިވެހި ފިލްމީ ދާއިރާގެ މަޝްހޫރު ޑައިރެކްޓަރު އަދި ސްކްރީން ރައިޓަރު އަމްޖަދު އިބްރާހީމް (އަމްޖޭ) އަށް ޓްރީޓޮޕް ހޮސްޕިޓަލުގައި ފަރުވާ ދޭން ފަށައިފިއެވެ.

މައުލޫމާތު ލިބިފައިވާ ގޮތުގައި، އަމްޖޭ ބަލިވެ އުޅޭތާ ދުވަސްތަކެއް ވެފައިވާއިރު، އޭނާގެ ހާލަތު ގޯސްވެ އެޑްމިޓްކުރީ ފުއްޕާމޭގައި ފެން ހެދުމުގެ ސަބަބުންނެވެ. އޭނާ އަށް ފަރުވާ ދެމުންދަނީ ހިތުގެ ބަލިތަކަށް ޚާއްޞަ ފަރުވާދޭ ޔުނިޓް ނުވަތަ (ސީސީޔޫ) ގައެވެ.

އަމްޖަދު އިބްރާހީމަކީ ދިވެހި ސިނަމާގައި އެންމެ ގިނަ ފިލްމު ޑައިރެކްޓްކުރުމުގެ ރެކޯޑް އޮތް، ދާއިރާގެ ނުފޫޒުގަދަ ފަންނާނެކެވެ. 1967 ވަނަ އަހަރު އުފަންވި އަމްޖޭ ފިލްމީ މަސައްކަތްތަކުގެ ތެރެއަށް ވަނީ ސިފައިންގެ ޚިދުމަތުގައި 11 އަހަރު ހޭދަކުރުމަށްފަހު، ލަވަ ޑައިރެކްޓް ކުރުމުގެ ތެރެއިންނެވެ. އޭނާގެ ފުރަތަމަ ފީޗަރ ފިލްމަކީ 1996 ވަނަ އަހަރު ރިލީޒްކުރި "ހުރަސް" އެވެ. އޭގެ ކުރިން 1995 ވަނަ އަހަރު އޭނާ ވަނީ "މާބުރުގެ އުސޫލު" ގެ ނަމުގައި ޑްރާމާއެއްވެސް ގެނެސްދީފައެވެ.

އަމްޖޭގެ ފާހަގަކޮށްލެވޭ ކާމިޔާބު އުފެއްދުންތަކުގެ ތެރޭގައި "ސަނދުރަވިރޭ"، "ގުރުބާނީ"، "ލޯބީގެ އަނިޔާ"، "އަންބެއްގެ ލޯބި ފިރިއެއްގެ ވާޖިބު"، "ކަށްވަޅަށް ދާންދެން"، "އުދަބާނީ" އަދި "ރޭވުމުން" ފިލްމް ހިމެނެއެވެ. ޖުމްލަ 50 އަށްވުރެ ގިނަ ފިލްމު އުފައްދާފައިވާ އަމްޖޭއަކީ ދާއިރާއަށް ގިނަ އަދަދެއްގެ އައު މޫނުތަކެއް ތައާރަފްކޮށްދިނުމުގައިވެސް އިސް ދައުރެއް އަދާކުރި ފަރާތެކެވެ. އޭގެ ތެރޭގައި ރާއްޖޭގެ މަޝްހޫރު ފިލްމް އެކްޓަރު ޔޫސުފް ޝަފީޢު (ޔޫއްޕެ) ފާހަގަކޮށްލެވެއެވެ.

އަމްޖޭގެ ފަންނީ ޚިދުމަތްތަކުގެ އަގުވަޒަންކުރުމުގެ ގޮތުން 2016 ވަނަ އަހަރު ބޭއްވި ގައުމީ ފިލްމް އެވޯޑްސްގައި "ލައިފްޓައިމް އެޗީވްމަންޓް އެވޯޑް" އަމްޖޭއަށް ވަނީ ދީފައެވެ. މީގެ އިތުރުން، އޭނާ ޑައިރެކްޓްކުރި 50 ފިލްމު ހަމަކުރުމުގެ އުފަލުގައި 2017 ވަނަ އަހަރު ޚާއްޞަ ފިލްމު ފެސްޓިވަލެއްވެސް ބާއްވާފައިވެއެވެ.