އެކި ސަބަބުތަކާހުރެ ޢުމްރާއަށް ނުފުރިފައި ތިބި ދިވެހި ޢުމްރާވެރިންނަށް، ދަތުރުކުރެވޭނެ އިންތިޒާމުތަކެއް ހަމަޖެއްސުމަށް ސަރުކާރުން މަސައްކަތް ފަށައިފިއެވެ.

އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު މިރޭ އެ މަނިކުފާނުގެ ފޭސްބުކް ޕޭޖުގައި ކުރެއްވި ޕޯސްޓެއްގައި ވިދާޅުވީ އެކި ކުންފުނިތަކުގެ ހަވާލުގައި ޢުމްރާއަށް ދިއުމަށް ނުފުރިފައި ތިބި ފަރާތްތަކާއި، ބައެއް ޤައުމުތައް މެދުވެރިކޮށް ޓްރާންސިޓްކޮށް ދަތުރުކުރަން އުޅުނު ނަމަވެސް ފްލައިޓްތައް ކެންސަލްވުމުގެ ސަބަބުން މަޑުކުރަން ޖެހިފައިވާ ފަރާތްތަކަށް ފުރޭނެ ގޮތެއް ހޯދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިރުޝާދު ދެއްވާފައިވާ ކަމަށެވެ. މި އިރުޝާދާ އެއްގޮތަށް، އިސްލާމީ ކަންތައްތަކާ ބެހޭ މިނިސްޓްރީއާއި، މޯލްޑިވްސް ޙައްޖު ކޯޕަރޭޝަން އަދި ޤައުމީ އެއާލައިން "މޯލްޑިވިއަން" ގުޅިގެން މިހާރު މަސައްކަތްތަކެއް ކުރަމުންދާ ކަމަށް ޑރ. ޝަހީމް ވިދާޅުވިއެވެ. އެގޮތުން މިހާތަނަށް ބެލި ބެލުމުން 150 މީހަކު ފުރަން ބޭނުންވެފައި ތިބިކަން ފާހަގަކުރެވިފައިވާކަން ވަޒީރު ޝަހީމް ވިދާޅުވިއެވެ.

މީގެ އިތުރުން ޑރ. ޝަހީމް ވިދާޅުވީ، ފްލައިޓެއް ޗާޓަރު ކުރެވޭނެ ގޮތް ވެއްޖެ ނަމަ، މިހާރު ފާހަގަވެފައިވާ މީހުންގެ އިތުރުން ވެސް ޖާގަ ބޭނުންވާ ފަރާތްތަކަށް، ޖާގަ ހުރި މިންވަރަކުން ފުރުޞަތު ދެވޭނެ ކަމަށެވެ. ނަމަވެސް ވަގުތު ކުޑަތަންވެފައިވުމާއެކު މިކަމުގައި ގޮންޖެހުންތަކެއް ހުރިކަން ފާހަގަކުރައްވައި، އެ ދަތިތައް ޙައްލުކުރުމަށް މަސައްކަތް ކުރަމުންދާ ކަމަށް ވެސް ޝަހީމް ވިދާޅުވިއެވެ.

މި ދަތުރުތަކުގެ ޚަރަދު ހަމަޖައްސާނީ އާންމުކޮށް ވެސް ޢުމްރާ ދަތުރުތަކުގައި އޮންނަ އުޞޫލުން ޢުމްރާވެރިން އަމިއްލައަށެވެ.

ރައްޔިތުންނާ ގުޅުންހުރި މިފަދަ މުހިންމު ކަންކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބަހައްޓަވާ އަހައްމިއްޔަތު ފާހަގަކުރައްވައި، ވަޒީރު ވަނީ ރައީސަށް ޝުކުރު އަދާކުރައްވާފައެވެ. މީގެ އިތުރުން މޯލްޑިވިއަންއާއި ޙައްޖު ކޯޕަރޭޝަނުން މިކަމުގައި ދެއްވާ އެއްބާރުލުން ވެސް ވަޒީރު ވަނީ ފާހަގަކުރައްވާފައެވެ.