ކުރިއަށް އޮތް ލޯކަލް ކައުންސިލް އިންތިޚާބުގައި ވެރިކަން ކުރާ ޕީއެންސީގެ އެއްވެސް ކެންޑިޑޭޓަކަށް ވޯޓު ނުދިނުމަށް، ވެލިދޫ ދާއިރާގެ މެންބަރު މުޙައްމަދު އައްބާސް ދިވެހި ރައްޔިތުންނަށް ގޮވާލައްވައިފިއެވެ.

އައްބާސް މިކަމަށް ގޮވާލެއްވީ ޤައުމުގެ މިހާރުގެ ހާލަތާއި ރައްޔިތުންގެ ދިރިއުޅުމަށް އަންނަމުންދާ ބަދަލުތަކާ ގުޅޭގޮތުން ކަންބޮޑުވުން ފާޅުކުރަށްވަމުންނެވެ. އެގޮތުން އައްބާސް ވިދާޅުވީ، ފާއިތުވި ދެ އަހަރު ދުވަހު ސަރުކާރުގެ އަމަލުތައް ހުރިގޮތުންނާއި ކަންތައްތައް ހިނގަމުންދާ ގޮތަށް ބަލާއިރު، ރައްޔިތުންގެ ހާލަތު އިތުރަށް ގޯސްވަމުންދާ ކަމަށެވެ.

އަދި ރައްޔިތުންގެ އަތްމަތި ދަތިވެ، ޤައުމު އަޅުވެތިކަމަކާ ދިމާލަށް ދިއުމުގެ ބިރު އޮތްކަން ފާހަގަކުރައްވައި، ރައްޔިތުންނަށް ހެޔޮގޮތް އެދޭތީ ޕީއެންސީއަށް ވޯޓު ނުދިނުމަށް އޭނާ ތަކުރާރުކޮށް އިލްތިމާސްކުރެއްވިއެވެ. މި ސަރުކާރު އައިފަހުން ތަކެތީގެ އަގު އެއްދުވަހުން އަނެއްދުވަހަށް ބޮޑުވަމުންދާކަން ފާހަގަކުރައްވައި އައްބާސް ވިދާޅުވީ، ޑޮލަރުގެ އަގު މަތިވެ، ކަރަންޓު ބިލާއި ފެން ބިލުތައް އިންތިހާއަށް ބޮޑުވެފައިވާ ކަމަށެވެ. މީގެ ސަބަބުން އާންމު ރައްޔިތުންގެ ދިރިއުޅުމުގެ ހާލަތު ދަށަށް ގޮސްފައިވާ ކަމަށް އޭނާ ވިދާޅުވިއެވެ.

"ރިޝްވަތުގެ ހުތުރު ފައިސާގެ ދަޅައަށް ތިޔަ ލޮބުވެތި ރައްޔިތުންގެ ނަފުސު ވިއްކާނުލައްވާ،" އައްބާސް ވިދާޅުވިއެވެ.

އޭގެ އިތުރުން އައްބާސް ވިދާޅުވީ މި ޤައުމާއި ޤައުމުގެ މުސްތަޤުބަލާ މެދު ހެޔޮ ވިސްނުން އިސްކޮށް، ކުރިއަށް އޮތް އިންތިޚާބުގައި ރައްޔިތުންގެ ބާރު ދެއްކުމަކީ މުހިންމު ކަމެއް ކަމަށެވެ. ސަރުކާރުގެ ޚަރަދުތަކަށް ފާޑުވިދާޅުވަމުން އައްބާސް ވިދާޅުވީ، ރައްޔިތުންގެ ޓެކްސް ފައިސާއިން ރައްޔިތުންނަށް "ދަޅަ" ދެއްކުމަށް ސަރުކާރުން ސިޔާސީ ކަންކަމަށް ކުރާ ހަރަދު އިތުރުވެފައިވާ ކަމަށެވެ.

އަދި ސަރުކާރުގެ ބޮޑުންގެ ޖީބުތައް ބޮޑުވެ، އެފަރާތްތަކުން މަހުޖަނުންނަށް ވަމުންދާއިރު، އާންމު ރައްޔިތުންނަށް 8000 ނުވަތަ 12000 ރުފިޔާގެ ވަޒީފާގެ ދަޅަ ދައްކައިގެން ސަރުކާރަށް ހުރިހާ ބާރެއް ނުދިނުމަށް އޭނާ ވަނީ އެދިވަޑައިގެންފައެވެ.