ރާއްޖޭގެ އެއްވެސް ރަށެއްގައި ފަށާފައިވާ ތަރައްޤީގެ އެއްވެސް މަޝްރޫޢެއް ރަނގަޅަށް ކުރިއަށް ނުދާ ކަމަށާއި، ސަރުކާރުން މަސައްކަތް ކުރަނީ އިންތިޚާބާ ދިމާކޮށް ރައްޔިތުންނަށް "ދަޅަ" ދައްކަން ކަމަށް ވިދާޅުވެ ވެލިދޫ ދާއިރާގެ މެމްބަރު މުޙައްމަދު އައްބާސް ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި އެމްޑީއޭ އަށް ނިސްްބަތްވާ ވެލިދޫ ދާއިރާގެ މެމްބަރު މުޙައްމަދު އައްބާސް ވިދާޅުވީ، ސަރުކާރުން މިހާތަނަށް އައިއިރު އެއްވެސް ކަމެއް ނުކޮށް "ހާވަ ހާވާ" ތިބުމަށްފަހު، ކޮންމެ އިންތިޚާބަކާ ދިމާކޮށް ރައްޔިތުންގެ ލޮލުގައި އަނދުން އެޅުވުމަށްޓަކައި މަސައްކަތްތަކެއް ކުރާކަން ދައްކަން އުޅޭ ކަމަށެވެ. ނަމަވެސް އަމަލީ ގޮތުން ފެންނަނީ ހުސް ދޮގުތަކެއް ކަމަށް އޭނާ ވިދާޅުވިއެވެ.

މީގެ އިތުރުން، މި ސަރުކާރު އައި ފަހުން ރައްޔިތުންގެ ދިރިއުޅުމުގެ ހާލަތު އިތުރަށް ގޯސްވަމުންދާކަން ފާހަގަކުރައްވައި އައްބާސް ވިދާޅުވީ، ކަރަންޓު ބިލާއި ފެން ބިލުގެ އިތުރުން ތަކެތީގެ އަގުތައް އެއްދުވަހުން އަނެއްދުވަހަށް ބޮޑުވަމުންދާ ކަމަށެވެ. މީގެ ސަބަބުން އާންމު ރައްޔިތުން އުފުލަންޖެހޭ ތަކުލީފުތައް އިންތިހާއަށް އިތުރުވެފައިވާ ކަމަށް އޭނާ ވިދާޅުވިއެވެ.

ސަރުކާރު ހިންގާ މައި ޕާޓީ، ޕީއެންސީގެ ލޯގޯގައިވާ ދޫންޏަށް އިޝާރާތް ކުރައްވައި އައްބާސް ވިދާޅުވީ، "އެބުނާ ދޫންޏަށް" ދިވެހި ރައްޔިތުން ވޯޓު ދެއްވައިފިނަމަ، ފަހުން ކަރުނަ އަޅައި ރޯންޖެހޭނެ ކަމަށެވެ. އަދި ތިމާމެން އަމިއްލައަށް ބޯ ކެހިކަޑުލެއްގެ ހިތި ފިލުވަން ޖެހޭނީ ވެސް ހަމަ އަމިއްލައަށް ކަން ދަންނަންވާނެ ކަމަށް އޭނާ ވިދާޅުވިއެވެ.

ކުރިއަށް އޮތް ލޯކަލް ކައުންސިލް އިންތިޚާބާއި ގުޅޭގޮތުން ވާހަކަ ދައްކަވަމުން އައްބާސް އިތުރަށް ވިދާޅުވީ، މިއީ ދައުރުގެ މެދުތެރެއިން ބާއްވާ އިންތިޚާބެއް ކަމުން، ރައްޔިތުން ނިންމާ ގޮތެއްގެ ފަހަތުން އޭނާއަށް ވެސް ގޮތް ނިންމަން ވަރަށް ފަސޭހަވާނެ ކަމަށެވެ.

އައްބާސްގެ މި ފާޑުކިޔުންތައް އަމާޒުވެފައި މިވަނީ ވޯޓް ކަރުދާހުގައި ޖަހާފައިވާ ނަމްބަރަކަށް ނަމަކަށް ނުބަލައި ދޫންޏަށް ވޯޓް ދިނުމަށް ރައީސް މުޢިއްޒު ގޮވާލައްވާފައިވަނިކޮށެވެ.