ފިނޭންސް މިނިސްޓްރީގެ އެންމެ ފަހުގެ ހަފުތާގެ މާލީ ރިޕޯޓުން ދައްކާ ގޮތުގައި، މިއަހަރުގެ މާރިޗު 19 ގެ ނިޔަލަށް ދައުލަތުގެ ބަޖެޓު އޮތީ 2.10 ބިލިއަން ރުފިޔާގެ ސާޕްލަސްއެއްގައެވެ. މިއީ މިދިޔަ 2025 ވަނަ އަހަރުގެ މި މުއްދަތުގައި ރެކޯޑުކުރެވުނު 873.7 މިލިއަން ރުފިޔާގެ ސާޕްލަސްއާ އަޅާބަލާއިރު ބޮޑު ކުރިއެރުމެކެވެ.

ބަޖެޓު ސާޕްލަސްވުމުގެ މައިގަނޑު ސަބަބަކީ ޓެކްސްގެ ގޮތުގައި ލިބުނު އާމްދަނީ އިތުރުވުމާއި، ތަރައްޤީގެ މަޝްރޫއުތަކަށް ކުރާ ހޭދަ ނުވަތަ ކެޕިޓަލް ޚަރަދުތައް ބޮޑުތަނުން މަދުވުމެވެ. އެގޮތުން، ދައުލަތަށް ލިބުނު ޖުމްލަ އާމްދަނީ 9.38 ބިލިއަން ރުފިޔާއަށް އަރާފައިވާއިރު، ޖުމްލަ ޚަރަދު ވަނީ 7.27 ބިލިއަން ރުފިޔާއަށް ދަށްވެފައެވެ.

އާމްދަނީއަށް ބަލާއިރު، ޓެކްސްގެ ގޮތުގައި ލިބުނު އާމްދަނީ ވަނީ މިދިޔަ އަހަރުގެ 6.85 ބިލިއަން ރުފިޔާއިން މިއަހަރު 7.73 ބިލިއަން ރުފިޔާއަށް އިތުރުވެފައެވެ.

މީގެ ތެރެއިން އެންމެ ބޮޑު އާމްދަނީއެއް ލިބިފައިވަނީ ޖީ.އެސް.ޓީގެ ގޮތުގައި ލިބުނު 4 ބިލިއަން ރުފިޔާއިންނެވެ. އޭގެ ތެރޭގައި ޓޫރިޒަމް ޖީ.އެސް.ޓީގެ ގޮތުގައި ލިބުނު 2.86 ބިލިއަން ރުފިޔާ ހިމެނެއެވެ. ނަމަވެސް، ޓެކްސް ނޫން ގޮތްގޮތުން ލިބުނު އާމްދަނީ ވަނީ 2.07 ބިލިއަން ރުފިޔާއިން 1.60 ބިލިއަން ރުފިޔާއަށް ދަށްވެފައެވެ.

ޚަރަދުތަކުގެ ތެރެއިން އެންމެ ފާހަގަކޮށްލެވޭ ބަދަލަކީ ތަރައްޤީގެ މަޝްރޫއުތަކަށް ކުރާ ހޭދަ ނުވަތަ ޕީ.އެސް.އައި.ޕީ ޚަރަދުތައް 857.7 މިލިއަން ރުފިޔާއިން 695.4 މިލިއަން ރުފިޔާއަށް ދަށްވުމެވެ.

ޚާއްޞަކޮށް ދަތުރުފަތުރާއި، ތިމާވެށި ރައްކާތެރިކުރުމާއި، ބޯހިޔާވަހިކަމުގެ މަޝްރޫއުތަކަށް ކުރި ހޭދަ ވަނީ ވަރަށް ބޮޑަށް މަދުވެފައެވެ. މީގެ އިތުރުން، ދަރަނި އަދާކުރުމާއި އިންޓްރެސްޓަށް ކުރި ހޭދަވެސް ވަނީ 1.45 ބިލިއަން ރުފިޔާއިން 577.7 މިލިއަން ރުފިޔާއަށް ދަށްވެފައެވެ.

ރިކަރަންޓް ޚަރަދުތަކަށް ބަލާއިރު، މުސާރަ އާއި އިނާޔަތްތަކަށް ކުރި ހޭދަ 2.73 ބިލިއަން ރުފިޔާއަށް އިތުރުވެފައިވާއިރު، އިދާރީ އަދި ހިންގުމުގެ ޚަރަދުތައް ވަނީ 3.88 ބިލިއަން ރުފިޔާއަށް ދަށްވެފައެވެ. އެހެންނަމަވެސް، އެކި އެހީތަކާއި އިނާޔަތްތަކަށް ކުރި ހޭދަ އާއި ކައުންސިލްތަކަށް ދޭ ބްލޮކް ގްރާންޓުގެ އަދަދު ވަނީ އިތުރުވެފައެވެ.

މުއައްސަސާތަކުގެ ތެރެއިން އެންމެ ބޮޑު ހޭދައެއް ކޮށްފައިވަނީ އެޑިޔުކޭޝަން މިނިސްޓްރީ، އެންސްޕާ، ފުލުހުންގެ ޚިދުމަތް އަދި ހެލްތު މިނިސްޓްރީ ފަދަ އިދާރާތަކުންނެވެ.