ފޭސްބުކް މެސެންޖާ މެދުވެރިކޮށް މީހަކާ ރަހުމަތްތެރިކަން އުފައްދައި، އޮޅުވާލައިގެން 50،000 ރުފިޔާ ފޭރުނު މައްސަލައެއްގައި މީހަކު ހައްޔަރުކޮށް ބަންދު މުއްދަތު ޖަހައިފިއެވެ.

ފުލުހުން މިއަދު ބުނީ، މި މައްސަލާގައި ހައްޔަރުކޮށްފައިވަނީ މޫސާ މުހައްމަދު (38އ)، މ. އޮމެގާ ކަމަށެވެ. އޭނާ ހައްޔަރުކޮށްފައިވަނީ މިދިޔަ ހޮނިހިރު ދުވަހުއެވެ. އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ އޭނާ 15 ދުވަހަށް ބަންދުކުރުމަށް އަމުރުކޮށްފައެވެ.

މި ހާދިސާގެ ތަފްސީލު ހިއްސާކުރަމުން ފުލުހުން ބުނީ، މިދިޔަ މަހުގެ 24 ވަނަ ދުވަހު މޫސާ މުހައްމަދު ވަނީ ފޭސްބުކް މެސެންޖާ މެދުވެރިކޮށް ވިކްޓިމްއާ ގުޅުން އުފައްދާފައި ކަމަށެވެ. އެއަށްފަހު، ވައިބާ މެދުވެރިކޮށް ލިންކެއް ފޮނުވައި، އެ ލިންކަށް ވިކްޓިމް ލަށްވާ ފިތުވާފައިވެއެވެ. ލިންކަށް ފިތާލުމާއެކު ވިކްޓިމްގެ ފޯނު ރީސެޓުވެ، އޭނާގެ ބޭންކު އެކައުންޓުގައި ހުރި 50,000 ރުފިޔާ ވަނީ ކެނޑިފައެވެ.

ފުލުހުންގެ ތަހުގީގަށް އެނގިފައިވާ ގޮތުގައި، ވިކްޓިމްގެ އެކައުންޓުން ކެނޑުނު ފައިސާ ޖަމާވެފައިވަނީ މޫސާ މުހައްމަދުގެ ނަމުގައި ހުޅުވާފައިވާ ބޭންކު އެކައުންޓަށެވެ.

މި މައްސަލަ ފުލުހުން އިތުރަށް ތަހުގީގު ކުރަމުންދާއިރު، މިފަދަ ސްކޭމްތަކުން ރައްކާތެރިވުމަށް ފުލުހުން ވަނީ އާންމުންނަށް އިލްތިމާސްކޮށްފައެވެ. އެގޮތުން ނުދަންނަ މީހުން ފޮނުވާ އެކި ކަހަލަ ލިންކުތަކަށް ނުފިތުމަށާއި، އަމިއްލަ މައުލޫމާތާއި ބޭންކު ތަފްސީލު އެފަދަ ފަރާތްތަކާ ހިއްސާ ނުކުރުމަށް ފުލުހުން ވަނީ ނަސޭހަތްތެރިވެފައެވެ.