ވޭތުވެދިޔަ ހަފުތާގެ ތެރޭގައި މާލެ ސަރަޙައްދުން ހިމަބިހި (މީސަލްސް) ޖެހިފައިވާ އިތުރު 2 މީހަކު ފެނިފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ.

އެޗްޕީއޭ އިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާ ގޮތުން، މި އަހަރުގެ މިހާތަނަށް ރާއްޖެއިން ހިމަބިހި ޖެހިގެން ޖުމްލަ 284 ކޭސް ވަނީ ރިޕޯޓްކޮށްފައެވެ. އަދި މި ބަލި ފެތުރުން ކޮންޓްރޯލް ކުރުމަށްޓަކައި ކުރިއަށްގެންދާ ވެކްސިން ދިނުމުގެ ޕްރޮގްރާމުގެ ދަށުން، މިހާތަނަށް 16,453 މީހުންނަށް ވަނީ ވެކްސިން ދީފައެވެ.

ހިމަބިހިން ރައްކާތެރިވުމަށްޓަކައި ހާއްސަ ސަމާލުކަމެއް ދިނުމަށް އެޗްޕީއޭ އިން ވަނީ އިލްތިމާސްކޮށްފައެވެ. މިގޮތުން، ހިމަބިހި ވެކްސިންގެ ދެ ޑޯޒް ފުރިހަމަކުރެވުނުކަން ޔަގީންނުވާ ފަރާތްތަކުން ވެކްސިން ދޭ މަރުކަޒަކަށް ގޮސް ޑޯޒްތައް ފުރިހަމަކުރުމަށް ވަނީ އެދިފައެވެ. މީގެއިތުރުން، ބަލި ޖެހިފައިވާ މީހަކާ ކޮންޓެކްޓްވެ، ވެކްސިންގެ 2 ޑޯޒް ފުރިހަމަނުވާ ފަރާތްތަކުން، ކޮންޓެކްޓުންނަށް ވެކްސިން ދިނުމަށް ކަނޑައެޅިފައިވާ ވަގުތުތަކުގައި ލަސްނުކޮށް ވެކްސިން ފުރިހަމަކުރުމަށް ވެސް އެ އެޖެންސީން އިރުޝާދު ދެއެވެ.

ހުން އައުމާއެކު ހަށިގަނޑުގައި ރަތް ބިހިތަކެއް ނަގާނަމަ، ލަސްނުކޮށް ސިއްހީ ފަރުވާ ހޯދުމަށް އެޗްޕީއޭ އިން ވަނީ އަންގާފައެވެ. އަދި ހިމަބިއްސަށް ޝައްކުކުރެވިގެން ޓެސްޓު ހަދައިފިނަމަ، ޓެސްޓުގެ ނަތީޖާ ލިބެންދެން އެހެން މީހުންނާ އެކަހެރިވެ (އައިސޮލޭޓްވެ) ތިބުމަށާއި، ސިއްހީ ހިދުމަތްދޭ ތަންތަނަށް ދާއިރު މާސްކު އެޅުމަށް ވަނީ އިލްތިމާސްކޮށްފައެވެ.

މިފަދަ އަލާމާތެއް ހުރިނަމަ އާންމުން އެއްވެ އުޅޭ ތަންތަނަށް ނުގޮސް ގޭގައި މަޑުކުރުމަކީ ބަލި ފެތުރުން ހުއްޓުވުމަށް މުހިންމު ކަމެކެވެ. އަދި ސިއްހީ ކަންކަމާ ގުޅޭ މައުލޫމާތު ހޯދުމުގައި ހަމައެކަނި ރަސްމީ މަސްދަރުތަކުން ދޫކުރާ މައުލޫމާތަށް ބަރޯސާވުމަށްވެސް އެޗްޕީއޭ އިން ވަނީ އާންމުންނަށް ހަނދާންކޮށްދީފައެވެ.