ގއ. މާމުޓާގެ އިރުން 12 މޭލު ބޭރުގައި ދޮށީގެ މަސްވެރިކަމަށް ބޭނުންކުރާ ކަނދުފައްޗެއް މިއަދު އަޅާފައިވާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ހާމަކޮށްފިއެވެ.

މަސްވެރިކަމާ ބެހޭ ވުޒާރާއިން ބުނީ، އޯ10ޑީ01-01 ނަންބަރު ދީފައިވާ މި ކަނދުފަތި މިއަދު އަޅާފައިވަނީ އެ ސަރަޙައްދުގެ މަސްވެރިންނަށް ކަނޑުމަތީގައި މަސް އައިނު ހޯދުމަށް ފަސޭހަކޮށްދިނުމުގެ ގޮތުން ކަމަށެވެ.

މި މަސައްކަތަކީ އަތޮޅުތަކުގެ ކަނދުފަތިތައް މަރާމާތުކޮށް، އާ ކަނދުފަތިތައް ގާއިމުކުރުމަށް މަސްވެރިކަމާ ބެހޭ ވުޒާރާގެ ފަންނީ ޓީމުން ކުރިއަށްގެންދާ ޚާއްޞަ ދަތުރުގެ ތެރެއިން ކުރެވުނު މަސައްކަތެކެވެ. މި ދަތުރުގެ ތެރެއިން މިހަފްތާގައި ވަނީ ލ. މާބައިދޫ އިރުން 11 މޭލު ބޭރުގައި އޮތް ދޮށީގެ މަސްވެރިކަމަށް ބޭނުންކުރާ ކަނދުފަތި ކެނޑިގެން އޮޔާދިއުމާ ގުޅިގެންނާއި، ތ. ގުރައިދޫ އިރުދެކުނުން 9 މޭލު ބޭރުގައި އޮތް ކަނދުފަތި އޮޔާ ގޮސްފައިވާތީ، އެ ސަރަޙައްދު ތަކުގައިވެސް އަލުން ކަނދުފަތި އަޅާފައެވެ.

މަސްވެރިކަމާ ބެހޭ ވުޒާރާއިން ބުނެފައިވަނީ، ދޮށީގެ މަސްވެރިކަމަށް ޚާއްޞަކޮށްގެން އަޅާ މިފަދަ ކަނދުފަތިތައް އަލުން ގާއިމުކުރެވިގެން ދިއުމާއެކު، އަތޮޅުތަކުގައި ދޮށީގެ މަސްވެރިކަން ކުރާ އުޅަނދު ފަހަރަށް ބޮޑެތި ލުއިފަސޭހަތަކެއް ލިބިގެންދާނެ ކަމަށެވެ. ޚާއްޞަކޮށް މަސް އައިނު ހޯދުމަށް ކުރަންޖެހޭ ދަތުރުތައް ކުރުވެ، ތެލަށް ކުރާ ހޭދަ ބޮޑުތަނުން ކުޑަވެގެންދާނެ ކަމަށް އެ ވުޒާރާއިން ހާމަކޮށްފައިވެއެވެ.

ދޮށީގެ މަސްވެރިކަމަކީ ތިމާވެއްޓާ ރައްޓެހި އަދި ދެމެހެއްޓެނިވި ގޮތެއްގައި ރާއްޖޭގައި ކުރާ މަސްވެރިކަމަކަށްވާތީ، މި ކަނދުފަތިތަކަކީ ކަނޑުގެ ދިރުންތަކަށް ގެއްލުން ނުވާގޮތަށް، ކަޅުބިލަމަސް ބޭނުމަށް މަގުފަހިކޮށްދޭ މުހިންމު ވަސީލަތެއް ކަމަށް މަސްވެރިކަމާ ބެހޭ ވުޒާރާއިން މަޢުލޫމާތު ދީފައިވެއެވެ.