ރާއްޖެއަށް އަންނަ ބޮޑެތި އިންވެސްޓްމަންޓްތަކާ ގުޅުވައިގެން ދޮގު ވާހަކަދައްކަވައި، އިންވެސްޓަރުން ފައްސާލުމަށް ކުރީގެ ރައީސް ޔާމީން ޢަބްދުލްޤައްޔޫމް ކުރަSqވާ މަސައްކަތްޕުޅުތަކާ ގުޅިގެން، އެމަނިކުފާނުގެ ދިވެހި ޤައުމާމެދު އޮތް އިޚްލާސްތެރި ނިޔަތާމެދު ސުވާލު އުފެދޭ ކަމަށް ފަންނާއި ސަޤާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވެއްޖެއެވެ.

މީސްމީޑިއާގައި ޙިއްސާކުރެއްވި މެސެޖެއްގައި ހީނާ ވިދާޅުވީ، ރާއްޖެއަށް އަންނަ ބޮޑެތި އިންވެސްޓްމަންޓްތަކާ ބެހޭގޮތުން ދޮގު ވާހަކަ ފަތުރައި، ސަރުކާރާ ދޭތެރޭ ފިތުނަ އުފައްދައި، އިންވެސްޓަރުންގެ ހިތުގައި ލަކުނު ޖައްސައި ލައްޖެއްސުމުގެ ނަތީޖާ މީގެ ކުރިންވެސް މި ޤައުމުން ފެނިގެން ގޮސްފައިވާ ކަމަށެވެ. އަދި އެކަން އެންމެ ރަނގަޅަށް ތަޖުރިބާ ކުރެވުނު "ފާފު އަތޮޅުގެ" މަޝްރޫޢުން ފިލާވަޅު ލިބިގެން، ރާއްޖެއަށް އަންނަ މިފަދަ އިންވެސްޓަރުން ފައްސާލުމަށް ކުރެވޭ މަސައްކަތްތަކުން އެ ބޭފުޅުންގެ އިޚްލާސްތެރިކަމާމެދު ސުވާލު އުފެދޭ ކަމަށްވެސް އޭނާ ފާހަގަކުރެއްވިއެވެ.

ރަސްމާލެ މަޝްރޫޢުގެ ދަށުން އީގަލް ހިލްސްއިން ކުރާ އިންވެސްޓްމަންޓަށް އަލިއަޅުއްވާލައްވަމުން ހީނާ ވިދާޅުވީ، އެ އިންވެސްޓްމަންޓުން ދައުލަތަށް ލިބޭނެ ކަމަށް ބެލެވޭ އާމްދަނީއަކީ ރާއްޖޭގެ 179 ރިސޯޓާއި، 16 ހޮޓަލާއި، 920 ގެސްޓްހައުސް އަދި 165 ސަފާރީން މިހާރު ލިބޭ ޖުމްލަ އާމްދަނީއަށްވުރެ ބޮޑު އާމްދަނީއެއް ކަމަށެވެ. އަދި މިހާރު ރާއްޖޭގެ ފަތުރުވެރިކަމުގެ ދާއިރާގެ ޖުމްލަ އިންވެސްޓްމަންޓަކީ 13.7 ބިލިއަން ޑޮލަރު ކަންވެސް އޭނާ ހާމަކުރެއްވިއެވެ.

"ތާއަބަދު ނަފްރަތާ ހަސަދަވެރިކަމުގެ އަނދިރި ކަމުގެ ތެރޭގައި ނުތިބެ، ވެރިކަމުގެ ދަހިވެތިކަން އެއްފަރާތްކޮށް ޤައުމީ ވިސްނުމުގައި ކަންކަމާމެދު ވިސްނާކަށް ނުވޭތޯ؟" ހީނާ ސުވާލު އުފައްދަވާފައިވެއެވެ.

ހީނާ މިބީދައިން ރައީސް ޔާމީނަށް ރައްދު ދެއްވާފައިވާއިރު، ރައީސް ޑރ. މުޙައްމަދު މުޢިއްޒުގެ ސަރުކާރުން ކުރިއަށްގެންދާ ތަރައްޤީގެ ބޮޑެތި މަޝްރޫޢުތަކަށް އިދިކޮޅު ފަރާތްތަކުންނާއި ރައީސް ޔާމީން ގެންދަވަނީ ފާޑުވިދާޅުވަމުންނެވެ. ނަމަވެސް ސަރުކާރުން ބުނަމުންދަނީ މި މަޝްރޫޢުތަކަކީ ޤައުމުގެ އިޤްތިޞާދަށް ބޮޑު އިންގިލާބީ ބަދަލެއް ގެނުވާނެ މުހިންމު މަސައްކަތްތަކެއް ކަމަށެވެ.