ރާއްޖޭގައި ފުރަތަމަ ފަހަރަށް މަޑް ކްރެބް ބޮޑު ކުރުމުގެ މަޝްރޫޢެއް ހިންގުމަށް މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއިން އަމިއްލަ ފަރާތަކަށް ހުއްދަ ދީފިއެވެ.

ގދ. ފިޔޯރީގައި ކުރިއަށްގެންދިއުމަށް ހަމަޖެހިފައިވާ މި މަޝްރޫޢަކީ ރާއްޖޭގެ ކަނޑުފަޅުގެ ވަސީލަތްތައް ސިންދަފާތުކޮށް، އެކުއަކަލްޗަރގެ ދާއިރާއިން އައު އާމްދަނީގެ ފުރުޞަތުތައް ފަހިކޮށްދިނުމަށް އެޅުނު މުހިންމު ފިޔަވަޅެއް ކަމަށް އެ ވުޒާރާއިން ވަނީ ހާމަކޮށްފައެވެ.

މަޑް ކްރެބަކީ އާންމުކޮށް ކަނޑޫފާތަކާއި ކުޅިތަކުގައި އުޅޭ، އަދި ކަނޑޫފާތަކުގެ ޤުދުރަތީ މާހައުލާއި އިކޯސިސްޓަމް ބެލެންސްކޮށް ބެލެހެއްޓުމުގައި މުހިންމު ދައުރެއް އަދާކުރާ އެއްޗެކެވެ. ކެއުމަށް މީރު މި ބާވަތުގެ ކަކުންޏަކީ ދުނިޔޭގެ ސީފޫޑް މާކެޓުގައްޔާއި ފަތުރުވެރިކަމުގެ ދާއިރާގައި ބޮޑު މަޤްބޫލުކަމެއް ހޯދާފައިވާ، އަގުބޮޑު ބާވަތެކެވެ.

މި މަޝްރޫޢުގެ ދަށުން ކަކުނި އާލާކުރުމަށް ހަމަޖެހިފައިވަނީ ކުދި ކަކުނި ނަގައިގެން، އެއަށް ޚާއްޞަކޮށް ތައްޔާރުކުރެވޭ ވަކި ސަރަޙައްދުތަކެއްގައި ބަހައްޓައިގެން ކާނާދީ ބޮޑުކުރާ އުޞޫލުންނެވެ. މިގޮތުން ކަކުންޏަށް ބޭނުންވާ ފައިދާހުރި ކާނާ ދިނުމާއި، ފެނުގެ ލޮނުކަމުގެ މިންވަރާއި ސާފުތާހިރުކަން އެކަށީގެންވާ ގޮތެއްގައި ބަލަހައްޓައިގެން، މާކެޓަށް ނެރެވޭވަރަށް ބޮޑުވަންދެން ރައްކާތެރިކަމާއެކު ގެންގުޅޭނެއެވެ.

މަސްވެރިކަމާ ބެހޭ ވުޒާރާއިން ބުނީ، ރާއްޖޭގައި މުޅިން އަލަށް ފެށޭ މި މަޝްރޫޢުގެ ސަބަބުން ރާއްޖޭގެ ރިސޯޓުތަކަށާއި ސީފުޑް ރެސްޓޯރެންޓްތަކަށް ބޭނުންވާ އަގުބޮޑު ކަކުނި ބޭރުގެ މާކެޓްތަކުން އިމްޕޯޓްކުރުން މަދުކުރެވި، ރާއްޖޭގައި އުފައްދައިގެން ވިއްކޭނެ މަގު ފަހިވެގެންދާނެ ކަމަށެވެ. ހަމައެއާއެކު މިއީ ރާއްޖޭގެ އިޤްތިޞާދީ ދާއިރާތައް ސިންދަފާތުކުރުމަށް ހުޅުވިގެންދާ އައު ދޮރެއް ކަމަށް އެ ވުޒާރާއިން ވަނީ ބުނެފައެވެ.