އީގަލް ހިލްސް ކުންފުނިން ރަސްމާލޭގައި ތަރައްޤީކުރާ "މޯލްޑިވްސް ވޯޓަރފްރަންޓް އެންޑް މެރީނާ" މަޝްރޫޢަކީ ރާއްޖޭގެ އިޤްތިޞާދަށް އިންޤިލާބީ ބޮޑު ބަދަލެއް ގެނެސްދޭނެ މަޝްރޫޢެއް ކަމަށާއި، މި މަޝްރޫޢުން ލިބޭ އާމްދަނީ މުޅި ފަތުރުވެރިކަމުގެ ދާއިރާއިން ލިބޭ އާމްދަނީއަށްވުރެ ބޮޑުވާނެ ކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގް ހަލީމް ވިދާޅުވެއްޖެއެވެ.

މީސްމީޑިއާގައި ހިއްސާކުރެއްވި މެސެޖެއްގައި ޙަލީމް ވިދާޅުވީ، މި ބިޔަ މަޝްރޫޢަކީ ދައުލަތް އެއްވެސް މިންވަރަކަށް ދަރަނިވެރިނުވެ، 20 ބިލިއަން އެމެރިކާ ޑޮލަރަށްވުރެ ބޮޑު އިންވެސްޓްމަންޓަކާއެކު ކުރިއަށްގެންދާ މަޝްރޫޢެއް ކަމަށެވެ. އަދި މިއީ ރާއްޖޭގެ މުޅި އިޤްތިޞާދީ މުސްތަޤްބަލު ބަދަލުކޮށްލާނެ ފަދަ މުހިންމު ފިޔަވަޅެއް ކަމަށްވެސް އޭނާ ވިދާޅުވިއެވެ.

މި މަޝްރޫޢުގެ ދަށުން ފާހަގަކޮށްލެވޭ މުހިންމު ކަންތައްތަކުގެ ގޮތުގައި ހަލީމް ފާހަގަ ކުރަށްވާފައިވަނީ:

5,000 ހައުސިންގ ޔުނިޓް: 3 ކޮޓަރީގެ އެޕާޓްމަންޓްތައް މުޅިން ހިލޭ ޑިވެލޮޕަރުގެ އަމިއްލަ ޚަރަދުގައި ބިނާކުރެވޭނެއެވެ.

54,000 އަށްވުރެ ގިނަ ވަޒީފާ: ދިވެހި ޒުވާނުންނަށާއި އާންމު ރައްޔިތުންނަށް އައު ވަޒީފާގެ ފަހި ފުރުޞަތުތައް އުފެދިގެންދާނެއެވެ.

11 ބިލިއަނަށްވުރެ ގިނަ ޑޮލަރު: މަޝްރޫޢުގެ ޑިވެލޮޕްމަންޓް މުއްދަތުގެ ތެރޭގައި ސީދާ ދައުލަތުގެ ބަޖެޓަށް ލިބިގެންދާނެއެވެ.

ޤައުމީ ސިޔާދަތު ހިމާޔަތްކުރުން: ދިވެހި ބިމުގެ މިލްކުވެރިކަން އެއްވެސް ފަރާތަކަށް ދޫނުކޮށް، މުޅި މަޝްރޫޢު ކުރިއަށްދާނީ ދިވެހިރާއްޖޭގެ ޤާނޫނުތަކުގެ ފުރިހަމަ ބާރާއި ހިމާޔަތުގެ ދަށުންނެވެ.

މީގެއިތުރުން، 2025 ވަނަ އަހަރުގެ މީރާގެ ރެކޯޑުތަކަށް އަލިއަޅުއްވާލައްވަމުން ހަލީމް ވިދާޅުވީ، ރާއްޖޭގެ މުޅި ފަތުރުވެރިކަމުގެ ދާއިރާގެ ޖުމްލަ އިންވެސްޓްމަންޓަކީ 13.7 ބިލިއަން އެމެރިކާ ޑޮލަރު ކަމަށެވެ. އަދި ރަސްމާލޭގެ މި މަޝްރޫޢުން ދައުލަތަށް ލިބޭނެ ކަމަށް ލަފާކުރެވޭ އާމްދަނީއަކީ ރާއްޖޭގައި މިހާރު ހިންގަމުންދާ 179 ރިސޯޓާއި، 16 ހޮޓަލާއި، 920 ގެސްޓްހައުސް އަދި 165 ސަފާރީ އުޅަނދު ހިމެނޭހެން، މުޅި ފަތުރުވެރިކަމުގެ ސިނާޢަތުން ދައުލަތަށް ލިބޭ ޖުމްލަ އާމްދަނީއަށްވުރެވެސް ބޮޑު އަދަދަކަށް ވާނެކަން ޔަގީންވާ ކަމަށް އޭނާ ވިދާޅުވިއެވެ. އެހެންކަމުން، މި މަޝްރޫޢުގެ ސަބަބުން ދިވެހި ރައްޔިތުންނަށް އަހަރަކު ލިބޭނެ އާމްދަނީ ވަރަށް ބޮޑަށް އިތުރުވެގެންދާނެ ކަމަށް އޭނާ ލަފާކުރަށްވާފައިވެއެވެ.

ހަމައެއާއެކު ހަލީމް ވިދާޅުވީ، އިދިކޮޅު ފަރާތްތަކުން މި މަޝްރޫޢާ ދެކޮޅަށް ވާހަކަދައްކައި ދޮގު މަޢުލޫމާތު ފެތުރުމަށް މަސައްކަތްކުރަނީ މި މަޝްރޫޢުގެ ބިޔަކަމާއި މީގެ ސަބަބުން ޤައުމަށް ލިބޭނެ ބޮޑު ކުރިއެރުން އެނގޭތީ ކަމަށެވެ. އަދި ސިޔާސީ ގޮތުން ޚިޔާލު ތަފާތުވުންތައް ހުރި ނަމަވެސް، ޤައުމަށް ލިބޭ މިފަދަ ތާރީޚީ ފުރުޞަތުތަކާ ދެކޮޅަށް މަސައްކަތްކޮށް ތަރައްޤީ ހުއްޓުވަން އުޅުމަކީ ޤައުމާމެދު އިޚްލާޞްތެރިކަމެއް ނެތުން ކަމަށްވެސް އޭނާ ވިދާޅުވިއެވެ.

ހަލީމް ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުރިއަށްގެންދާ މި މަޝްރޫޢަކީ ރާއްޖޭގެ އިޤްތިޞާދީ ކުރިއެރުމަށާއި، ދިވެހި ރައްޔިތުންނާއި ޒުވާނުންގެ ފާގަތި މުސްތަޤްބަލަކަށް އެޅޭ ވަރަށް މުހިންމު ފިޔަވަޅެއްކަން ރައްޔިތުން ބަލައިގަންނަ ކަމަށްވެސް ވިދާޅުވެފައެވެ.

ހަލީމް މިހެން ވިދާޅުވެފައިވާއިރު، ރަސްމާލޭގައި އީގަލް ހިލްސް މަޝްރޫއު ކުރިއަށް ގެންދިއުމުގެ ކުރިން އެ މަޝްރޫއާ ގުޅުންހުރި ބައެއް ގާނޫނުތައް ރައްޔިތުންގެ މަޖިލީހުން ފާސްކުރަންޖެހޭ ކަމަށާއި، މި މަޝްރޫއު ކުރިއަށްދާނީ ގާނޫނުއަސާސީއާއި ގާނޫނުތަކާ އެއްގޮތްވާ ގޮތުގެ މަތިން ކަމަށް ބަންޑާރަނައިބު އަހުމަދު އުޝާމް ވަނީ ވިދާޅުވެފައެވެ.

މި މަޝްރޫއު ހިންގުމަށްޓަކައި ފުށިދިއްގަރު ފަޅުން ހިއްކުމަށް ހަމަޖެހިފައިވާ 1،010 ހެކްޓަރުގެ ބިމުގެ ތެރެއިން 500 ހެކްޓަރުގެ ބިން، ދުނިޔޭގެ މުއްސަނދިންނަށް އަމާޒުކޮށްގެން އެޕާޓްމަންޓްތައް ތަރައްގީކޮށް ވިއްކުމަށް ޔޫއޭއީގެ އީގަލް ހިލްސް ކުންފުންޏަށް މިސަރުކާރުން ހަވާލުކުރީ މިދިޔަ ހޯމަ ދުވަހުއެވެ. ރަސްމާލެއިން ޔޫއޭއީ ކުންފުންޏަށް ބިން ދިން މައްސަލަ ބާތިލުކުރަން މިހާރުވަނީ ސުޕްރީމް ކޯޓަށްވެސް ހުށައަޅާފައެވެ.